Փաստ ինֆո

Երևանի Ավան և Նոր Նորք վարչական շրջանների դատարանում՝ դատավոր Դավիթ Հարությունյանի նախագահությամբ, «Հարսնաքար» ռեստորանային համալիրում հունիսի 17-ի բռնարարքի գործով այսօրվա դատական նիստում ավարտվեց «Դավիթ ԴՎՍ» ՍՊԸ տնօրեն Հրաչյա Զոհրաբյանի  հարցաքննությունը (հիշյալ ՍՊԸ-ին է  պատկանում  «Հարսնաքար» ռեստորանային համալիրը):

Մեղադրանքի կողմը միջնորդեց հրապարակել վկայի նախաքննական ցուցմունքները՝ դատաքննական ցուցմունքների հետ էական հակասությունների պատճառով: Պաշտպանական կողմն առարկեց միջնորդության դեմ, նշելով, որ եթե վկան տեղ- տեղ դեպքի հետ կապված ժամերի վերաբերյալ «մոտավորապես» բառն է օգտագործում կամ ինչ-ինչ հանգամանք չի հիշում, չի նշանակում, որ առկա է էական հակասություն:

Այդուհանդերձ դատարանը որոշում կայացրեց հրապարակել նախաքննական ցուցմունքը: Առկա հակասությունները վկան բացատրեց «Հարսնաքար»-ում և «Հարսնաքար-ի շուրջ լարված իրավիճակով: Նա ընդգծեց, որ ավելի հստակ է իր դատաքննական ցուցմունքը:  Մասնավորապես, նախաքննական ցուցմունքում, ըստ վկայի, ամբաստանյալ Նորայր Հայրապետյանն իրեն ասել է, որ իրենք հարվածել  են հաճախորդին, իսկ ըստ վկայի դատաքննական ցուցմունքի, Ն.Հայրապետյանը տնօրենին  ասել է, որ  ինքն է (Ն.Հայրապետյանը) հարվածել հաճախորդին: Այլ խոսքով՝ նախաքննական ցուցմունքում վկան նշել էր մի քանի անձանց, իսկ դատաքննության ժամանակ միայն Ն.Հայրապետյանի կողմից ռեստորանի հաճախորդին հարվածելու մասին։

Դատաքննական ցուցմունքում  վկան պնդեց նաև, թե գործով տուժողները ագրեսիվ էին, գինովցած, հայհոյել են, և որ  ծեծկռտուքի պատճառ է դարձել մարզահագուստվ  համալիրում չգտնվելու մասին  մատուցողի կողմից  տուժող Վահե Ավետյանին արված դիտողությունը: Ըստ վկայի, հաճախորդների գինովցած լինելը հանգեցրել է  իրավիճակի սրմանն  ու անկառավարելի դառնալուն:

Դատարանը  «Հարսնաքար»-ի գործով հաջորդ դատական նիստը նշանակեց 2013թ. հունվարի 14-ին:  Իսկ մինչ այդ գործում կներգրավվի  ևս մեկ պաշտպան, ով պաշտպան Սերգեյ Մկրտչյանի հետ մեկտեղ կիրականացնի ամբաստանյալ Դավիթ Ադամյանի պաշտպանությունը: Ս.Մկրտչյանը վաղվանից ևեթ գտնվելու է իր հերթական արձակուրդի մեջ: