Փաստ ինֆո

2012թ. առաջին 9 ամիսների ընթացքում ՀՀ ոստիկանության տարբեր ստորաբաժանումների կողմից հետախուզում է հայտարարվել 1232 անձի նկատմամբ: Նույն ժամանակաընթացքում հայտնաբերվել է ինչպես այս, այնպես էլ նախորդ տարիներին կատարած հանցագործության համար հետախուզվող 1416 անձ: Ընդ որում, հայտնաբերվածներից 126-ը հետախուզման մեջ են եղել այլ երկրների իրավապահ մարմինների կողմից:

ՀՀ ոստիկանությունն այսօր որոշակի փաստեր է ներկայացրել կատարած բացահայտումների վերաբերյալ. 20 տարի առաջ` 1992-ի մայիսի 22-ին, Երևանում օրը ցերեկով ծանր հանցագործության դեպք է գրանցվել: Մայակովսկի և Բուռնազյան փողոցների խաչմերուկում հնչել էր ինքնաձիգի կրակահերթ, արդյունքում` երկու վիրավոր` մի երիտասարդ ու մի երեխա: Երիտասարդը մահացել էր հիվանդանոցի ճանապարհին: 7-ամյա տղայի կյանքի համար բժիշկները մեկ ժամ պայքարել էին, բայց ավաղ` ապարդյուն. գլխի հրազենային վնասվածքը մահացու էր եղել:

Նախաքննական մարմնին հաջողվել էր պարզել, որ կատարվածը քրեական որոշ շրջանակների միջև բախման հետևանք էր: Հանցագործների թիրախը երիտասարդն էր, երեխան` պատահական զոհ: Քննությամբ պարզվել էր նաև, որ հանցագործությունը կատարել էր Սմբատ Ինջաբեկի Գրիգորյանը` իր երեք ընկերների հետ: Բայց այն ժամանակ կասկածյալներին հայտնաբերել չէր հաջողվել և հայտարարվել էր հետախուզում: Անցած տարիների ընթացքում քրեական գործի վարույթը մի քանի անգամ կասեցվել ու վերսկսվել էր:

Եվ ահա այս տարվա գարնանը ՀՀ ոստիկանության ՔՀԳՎ-ում նոր տեղեկություններ ստացվեցին ՌԴ գործընկերներից: Սմբատ Ինջաբեկի Գրիգորյանը հայտնաբերվեց Օրենբուրգ քաղաքում և տեղափոխվեց Երևան` առերեսվելու պատժի անխուսափելիությանը:

Մեկ այլ ուշագրավ դեպք` 19 տարվա վաղեմության. 1993 թ. օգոստոսին Մեխակ Հովակիմյանը երեք ընկերների հետ ավազակային հարձակում էր կատարել Գավառ քաղաքի մի բնակչի տան վրա: Դանակահարել էին տանտիրոջը և հափշտակել 5 միլիոն ռուբլի արժողության ոսկյա զարդեր և ադամանդներ: Տաք հետքերով կասկածյալներին հայտնաբերել չէր հաջողվել և նույն տարվա սեպտեմբերին նրանց նկատմամբ հայտարարվել էր հետախուզում: Հետո որոնողական աշխատանքները կրկին փակուղի էին մտել: Սակայն արդեն այս տարվա աշնանը իրավապահների ջանքերն արդյունք են արձանագրել, և օրեր առաջ` դեկտեմբերի 12-ին, ոստիկանության ՔՀԳՎ օպերատիվ խմբի կողմից Մոսկվա-Երևան չվերթով Հովակիմյանը էքստրադիցիայի է ենթարկվել Հայաստան:

Օրեր առաջ` դեկտեմբերի 6-ին հայ ոստիկանները ևս մի հետախուզվողի են հայտնաբերել ու Հոլանդիայից տեղափոխել Հայաստան: Հենրիկ Գրիգորյանի նկատմամբ հետախուզում էր հայտարարել ոստիկանության Վանաձորի բաժինը` հափշտակության և փողերի լվացման համար: Գրիգորյանն ինտերնետային կայքերից գնել էր ԱՄՆ քաղաքացիներին պատկանող և ԱՄՆ-ի բանկերում սպասարկվող գողացված պլաստիկ քարտերի տվյալներ և բացելով էլեկտրոնային կեղծ հաշիվներ` գողացված քարտերի գումարները փոխանցել էր իր հաշվին: Կանխիկացրել էր մոտ իննուկես միլիոն դրամ: Հենրիկ Գրիգորյանի նկատմամբ խափանման միջոց է ընտրվել կալանավորումը: Ի դեպ, նրան Հոլանդիայից տեղափոխելը հաջողվել է Հայաստանում Ինտերպոլի ԱԿԲ-ի շնորհիվ:

Ս.թ. նոյեմբերի վերջին Մեղրիի ոստիկանները Մեղրիի մաքսակետում հայտնաբերել են ինտերպոլի թուրքական բյուրոյի կողմից հետախուզվող մի թուրքի: Հայ ոստիկանները նրան կալանավորել ու տեղյակ են պահել հետախուզումը նախաձեռնողին:

Անդրադառնանք ևս մեկ բացահայտման. 2007 թ. հուլիսին ՌԴ Սոչի քաղաքի Ադլերի շրջանում ՌԴ քաղաքացիներ Արթուր Կարագոզյանը, Գրիգորի Երեմյանը, ևս երկու հանցակցի հետ, կազմակերպել և իրականացրել էին ՌԴ մի քաղաքացու սպանություն: Նրանք ապօրինի պահվող երեք տեսակի, տարբեր տրամաչափի հրազեններով կրակ էին բացել զոհի և նրան օգնության շտապող ընկերոջ վրա, վնասվածքներ պատճառել, ապա և գնդակահարել գետին տապալված վիրավորներին: Նրանց կրակահերթերից վիրավորվել էր նաև պատահական մի անցորդ, բարեբախտաբար` ոչ մահացու: Հարուցվել էր քրեական գործ և հայտարարվել հետախուզում միջազգային մակարդակով: Օրերս` դեկտեմբերի 14-ին, ՀՀ ոստիկանության ՔՀԳՎ-ի կողմից կազմակերպված ծավալուն օպերատիվ հետախուզական միջոցառման արդյունքում ոստիկանության Դիլիջանի բաժնի ծառայողների հետ համատեղ հենց Դիլիջանում հայտնաբերվել ու ձերբակալվել են 35-ամյա Արթուր Կարագոզյանն ու 29-ամյա Գրիգորի Երեմյանը: Նրանք այժմ կալանավորված են:

Չպետք է լինեն արտոնյալ հետախուզվողներ, ընդհանրապես ոստիկանի ձեռքը միշտ պետք է լինի հանցավորության շարժընթացի զարկերակին: ՀՀ ոստիկանությունը հետևողական աշխատանք է իրականացնում նախկինում կատարված հանցագործությունների բացահայտման և հետախուզման մեջ գտնվող անձանց հայտնաբերման ուղղությամբ,- ոստիկանության ինտերնետային էջի համաձայն սա է ՀՀ ոստիկանության այսօրվա և վաղվա ռազմավարությունը: