Փաստ ինֆո

Թերթը գրում է, որ անցած շաբաթվա վերջին սկսվել է Քրիստինե Պետրոսյանի դեմ հարուցված քրեական գործի դատաքննությունը, ով արդեն մեկ տարուց ավելի է կալանավորված է: Չնայած որ Ք. Պետրոսյանը երկու մանկահասակ երեխաների մայր է, բայց դատարանը վեց անգամ երկարացրել է նրա կալանքի ժամկետը: Նրան այնքան անսպասելի էին ձերբակալել, որ երեխաների խնամակալության հարցը մնացել էր չլուծված:

Ք. Պետրոսյանը մեղադրվում է առանձնապես խոշոր չափերի խարդախություն կատարելու մեջ (ՀՀ քրեական օրենսգրքի 178-րդ հոդված)՝ մատնանշելով այն հանգամանքը, որ նրան մեղադրանք է առաջադրվել ընդամենը մեկ մարդու բանավոր ցուցմունքի հիման վրա:

Ամուսնու մահից հետո գրավատունը, որը Ք. Պետտրոսյանի ամուսնուն էր պատկանում և որը գտնվում էր «Ոսկու շուկա»-ի հարևանությամբ, անցել է Ք. Պետրոսյանին, դրա հետ միասին նաև նրա՝ մոտ 110 000 դոլար պարտքը, որը պետք էր վերադարձնել ամուսնու՝ ռուսաստանյան բիզնեսմեն- ընկերոջը:

Ցանկություն ունենալով շուտափույթ ազատվել ամուսնու՝ ժառանգություն թողած պարտքից՝ Ք. Պետրոսյանն ամուսնու մեկ այլ ընկերոջից՝ Հարություն Խ.-ից, տոկոսով փող է վերցրել:

Թերթը նշում է, որ շատերի պնդմամբ Հարություն Խ.-ն նախկին ոստիկանապետ Ալիկ Սարգսյանի սանիկն է: Ու չնայած որ Ք. Պետրոսյանը պնդում է, որ ողջ պարտք-գումարը, տոկոսներով հանդերձ, վճարել է, այնուամենայնիվ Հարություն Խ.-ի՝ ՀՀ ոստիկանության կազմակերպված հանցավորության դեմ պայքարի վարչությունում արված հայտարարության հիման վրա կինը հայտնվել է ճաղերի ետևում:

Պաշտպան Կ. Հակոբյանը երեք հայց է ներկայացրել դատարան՝ Ք. Պետրոսյանի խափանման միջոցը փոխելու վերաբերյալ, որոնք դատարանը մերժել է՝ պատճառաբանելով, որ նա կարող է լքել երկիրը:

Թերթը հավելում է, որ պաշտպանը բողոք է ներկայացրել Մարդու իրավունքների եվրոպական դատարան, որն ընդունվել է վարույթ: Չէ՞ որ առանց երեխաների խնամակալության հարցը լուծելու մոր ձերբակալությունը, ըստ եվրոպական մի շարք կոնվենցիաների, համարվում է երեխաների նկատմաբ խոշտանգման դրսևորում:

«Այնպես որ, չի բացառվում, որ Հայաստանի Հանրապետությունը հերթական անգամ ստիպված կլինի մեծ գումարներ վճարել՝ մեր իրավապահների ոչ պրոֆեսիոնալ և չհիմնավորված դաժան գործողությունների պատճառով»,- եզրափակում է հոդվածագիրը: