Փաստ ինֆո

Թերթն անդրադառնում է «Մատաղիսի» գործին` նշելով, որ 9 տարի շարունակ նախաքննական մարմնում և դատարանից դատարան «թափառող» այս գործն այդպես էլ հանգուցալուծում չստացավ: Ըստ թերթի` «Մատաղիսի» գործն այսօր էլ գտնվում է փակուղում, քանի որ սպանված զինծառայողների համար ոչ ոք մինչ օրս պատիժ չի կրել:

Թերթը գրում է, որ երեք տղաների` Արայիկ Զալյանի, Մուսա Սերոբյանի և Ռազմիկ Սարգսյանի մեղադրանքը կազմվել է վերջինիս խոստովանական ցուցմունքի հիման վրա: Նա` Ռ. Սարգսյանը, ժամանակին «ինքնախոստովանական» ցուցմունք է տվել դաժան ծեծի, խոշտանգումների հետևանքով:

Այն ժամանակ Ռ. Սարգսյանի ծնողները հայտարարում էին, որ քննիչները ցուցմունք կորզելու համար նրան ոչ միայն խոշտանգել են, այլև առաստաղից կախելով` ձեռքերը կապել ու սպառնացել են «դուբինկայով» բռնաբարել:

«Մի բան, սակայն, միանշանակ է. «Մատաղիսի» գործով այս երեք տղաների մեղադրանքն ապացուցազուրկ է»,- նշում է հոդվածագիրը:

Մինչդեռ թերթը հիշեցնում է, որ օրեր առաջ լրատվամիջոցները հրապարակել էին մի տեսանյութ, որտեղ նախկին զինդատախազ Գ. Ջհանգիրյանը կրկին պնդում էր, որ մարդասպաններն այս երեք տղաներն են, որոնք արդարացվեցին դատարանի վճռով: Որպես ապացույց` նա մատնանշել էր Ռ. Սարգսյանի ինքնախոստովանական ցուցմունքը:

Թերթը հիշեցնում է նաև, որ գործով դատավճիռ կայացրած դատավորները հետագայում, որպես պատիժ, հետ ուղարկվեցին ընդհանուր իրավասության դատարաններ: