Փաստ ինֆո

Թմրամիջոցների սիրահարները, ինչպես նաև դրանց անօրինական առևտրով զբաղվողները հնարավոր բոլոր միջոցներն օգտագործում են արտերկրից դրանք այստեղ հասցնելու կամ Հայաստանից առաքելու համար: Բնականաբար, առանց երկրորդ հանցանքը կատարելու` մաքսանենգության, դա հնարավոր չէ կատարել:

Երևանի նախկին բնակիչ, 1991 թ. ծնված Մարգար Ահարոնյանը, հանդիսանալով ԱՄՆ քաղաքացի, ըստ մեղադրական եզրակացության, 2012թ. հուլիսի 20-ին` ժամը 12:00-ի սահմաններում «Արմենիա միջազգային օդանավակայաններ» ՓԲԸ-ում բեռնափոխադրումներ իրականացնող «Կարգո Ջեթ Լայն» ՍՊԸ-ի միջոցով ԱՄՆ-ից, իր ընկեր Երամ Արշակյանից մաքսանենգությամբ  ստացել է զգալի չափերի մարիխուանա տեսակի թմրամիջոց:

Մարիխուանան մաքսային պահեստում ծանրոցի զննությամբ բացահայտել են ՀՀ ԿԱ պետական եկամուտների կոմիտեի մաքսանենգության դեմ պայքարի և կրկնակի մաքսային հսկողության վարչության «Զվարթնոց» բաժնի աշխատակիցները: Թմրամիջոցը հայտնաբերվել է «BURTS BESS» ֆիրմայի մաշկի խնամքի քսուքի տուփի միջից, պոլիէթիլենային փաթեթի մեջ փաթեթավորված վիճակում:

Մ. Ահարոնյանին մեղադրանք է առաջադրվել ՀՀ քրեական օրենսգրքի 215-րդ հոդվածի 2-րդ մասի և 268-րդ հոդվածի 1-ին մասի հատկանիշներով, որպես խափանման միջոց ընտրվել է կալանավորումը: Երևանի Մալաթիա-Սեբաստիա վարչական շրջանի ընդհանուր իրավասության դատարանը (նախագահող դատավոր` Արտակ Զախարյան) վերոնշյալ քրեական գործով դատական քննություն է նշանակել 2013 թ. հունվարի 15-ին: