Փաստ ինֆո

Դեկտեմբերի 22-ին ուժի մեջ մտան «ՀՀ քաղաքացիություն ստանալու, ինչպես նաև ՀՀ քաղաքացիությունը դադարեցնելու համար անհրաժեշտ փաստաթղթերի ցանկը և դրանք ներկայացնելու կարգը սահմանելու մասին» կառավարության 2007թ.-ի որոշման մեջ կատարված փոփոխություններն ու լրացումները:

Ըստ այդմ, մասնավորապես, հաստատվել է եկեղեցական այն կառույցների ցանկը, որոնց կողմից տրված մկրտության մասին փաստաթուղթը` հաստատված օտարերկրյա պետություններում ՀՀ դիվանագիտական ներկայացուցչության կամ հյուպատոսական հիմնարկի կողմից, մկրտվածի կամ նրա ծնողի ազգությամբ հայ լինելու մասին նշումով, համարվում է ազգությամբ հայ լինելը հաստատող փաստաթուղթ:

Ցանկում ընդգրկված են Մայր Աթոռ Սուրբ Էջմիածնի, Մեծի Տանն Կիլիկիո Կաթողիկոսության, Հայ Կաթողիկե Եկեղեցու թեմերը, ինչպես նաև Հայ Ավետարանական Համաշխարհային Խորհուրդը (Լոս-Անջելես, ԱՄՆ):

Մայր Աթոռ Սուրբ Էջմիածնի եկեղեցական կառույցներն են` Երուսաղեմի Հայոց Պատրիարքությունը (Երուսաղեմ, Սրբոց Հակոբեանց Միաբանություն), Կոստանդնուպոլսի Հայոց պատրիարքությունը (Ստամբուլ, Թուրքիա), Վիրահայոց Հայոց թեմ (Թբիլիսի, Վրաստան), Նոր Նախիջևանի և Ռուսաստանի Հայոց թեմը (Մոսկվա, Ռուսաստան), Հարավային Ռուսաստանի Հայոց թեմը (Կրասնոդար, Ռուսաստան), Ուկրաինայի Հայոց թեմը (Լվով, Ուկրաինա), Կենտրոնական Եվրոպայի Հայրապետական պատվիրակությունը (Վիեննա, Ավստրիա), Արևմտյան Եվրոպայի Հայրապետական պատվիրակությունը (Փարիզ, Ֆրանսիա), Ֆրանսիայի Հայոց թեմը (Փարիզ, Ֆրանսիա), Մեծ Բրիտանիայի Հայոց թեմը (Լոնդոն, Մեծ Բրիտանիա), Հունաստանի Հայոց թեմը (Աթենք, Հունաստան), Ռումինիայի և Բուլղարիայի Հայոց թեմերը (Սոֆիա, Բուլղարիա), Գերմանիայի Հայոց թեմը (Քյոլն, Գերմանիա), Շվեյցարիայի Հայոց թեմը (Ժնև, Շվեյցարիա), Կանադայի Հայոց թեմը (Մոնրեալ, Կանադա), ԱՄՆ-ի Հայոց Արևելյան թեմը (Նյու-Յորք, ԱՄՆ), ԱՄՆ-ի Հայոց Արևմտյան թեմը (Բըրբենք, Կալիֆոռնիա, ԱՄՆ), Արգենտինայի Հայոց թեմը (Բուենոս-Այրես, Արգենտինա), Բրազիլիայի Հայոց թեմը (Սան Պաուլո, Բրազիլիա), Ուրուգվայի Հայոց թեմը (Մոնտեվիդեո, Ուրուգվայ), Եգիպտոսի Հայոց թեմը (Կահիրե, Եգիպտոս), Դամասկոսի Հայոց թեմը (Դամասկոս, Սիրիա), Իրաքի Հայոց թեմը (Բաղդադ, Իրաք), Ավստրալիայի և Նոր Զելանդիայի Հայոց թեմը (Սիդնեյ, Ավստրալիա), Բելգիայի Հոգևոր Հովվություն (Բրյուսել, Բելգիա), Իսպանիայի և Պորտուգալիայի Հոգևոր Հովվությունը (Մադրիդ, Իսպանիա), Իտալիայի Հոգևոր Հովվությունը (Միլան, Իտալիա), Հոլանդիայի Հոգևոր Հովվությունը (Ամստերդամ, Հոլանդիա), Հունգարիայի և Չեխիայի Հոգևոր Հովվությունը (Հունգարիա), Շվեդիայի Հոգևոր Հովվությունը (Ստոկհոլմ, Շվեդիա), Եթովպիայի Հոգևոր Հովվությունը (Ադիս-Աբեբա, Եթովպիա), Սուդանի Հոգևոր Հովվությունը (Սուդան, Աֆրիկա), Կալկաթայի Հոգևոր Հովվությունը (Կալկաթա, Հնդկաստան):

Մեծի Տանն Կիլիկիո Կաթողիկոսության կառույցներն են` Մեծի Տանն Կիլիկիո Կաթողիկոսությունը (Անթիլիաս, Լիբանան), Լիբանանի թեմը (Բեյրութ, Լիբանան), Բերիո թեմը (Հալեպ, Սիրիա), Կիպրոսի թեմ (Նիկոսիա, Կիպրոս),

Հյուսիսային Ամերիկայի Արևելյան թեմը (Նյու Յորք, ԱՄՆ), Հյուսիսային Ամերիկայի Արևմտյան թեմը (Լոս Անջելես, ԱՄՆ), Կանադայի թեմը (Մոնրեալ, Կանադա), Հունաստանի թեմ (Աթենք, Հունաստան), Թեհրանի թեմ (Թեհրան, Իրան), Սպահանի թեմը (Նոր Ջուղա, Իրան), Ատրպատականի թեմը (Թավրիզ, Իրան), Քուվեյթի և Արաբական Ծոցի երկրների թեմը (Էլ Քուվեյթ), Վենեսուելայի Հոգևոր Հովվությունը (Կարակաս, Վենեսուելա):

Հայ Կաթողիկե Եկեղեցու կառույցներն են` Տանն Կիլիկիո Կաթողիկե Եկեղեցին (Զմմառ, Բեյրութ, Լիբանան), Վենետիկի Մխիթարյան Միաբանությունը (Սուրբ Ղազար, Վենետիկ, Իտալիա), Վիեննայի Մխիթարյան Միաբանությունը (Վիեննա, Ավստրիա), Հայաստանի, Վրաստանի, Ռուսաստանի և Արևելյան Եվրոպայի թեմը (Գյումրի, Հայաստան), Լատինական Ամերիկայի թեմը (Սան Պաուլու, Բրազիլիա), Միացյալ Նահանգների և Կանադայի թեմը (Նյու Յորք, ԱՄՆ), Եգիպտոսի թեմը (Կահիրե, Եգիպտոս), Ֆրանսիայի թեմը (Փարիզ, Ֆրանսիա), Բերիո թեմը (Հալեպ, Սիրիա), Դամասկոսի թեմը (Դամասկոս, Սիրիա), Կամիշլիի թեմը (Կամիշլի, Սիրիա), Քեսաբի թեմը (Քեսաբ, Սիրիա), Պոլսո թեմը (Ստամբուլ, Թուրքիա):

ՀՀ քաղաքացիություն ստանալու համար եկեղեցական կառույցների կողմից տրված մկրտության մասին փաստաթուղթն ազգությամբ հայ լինելը հաստատող միակը չէ: ՀՀ քաղաքացիություն հայցող ազգությամբ հայը կարող է ներկայացնել ՀՀ կառավարության որոշմամբ այդպիսիք ճանաչված փաստաթղթերից որևէ մեկը:

Դրանք են` օտարերկրյա պետության իրավասու մարմինների կողմից տրված և ապոստիլով հաստատված կամ հյուպատոսական վավերացմամբ` ազգությամբ հայ լինելու մասին փաստաթուղթը, ազգությամբ հայ լինելու հանգամանքը հիմնավորող այլ փաստաթուղթ` հաստատված օտարերկրյա պետություններում ՀՀ դիվանագիտական ներկայացուցչության կամ հյուպատոսական հիմնարկի կողմից, ծնողի (պապիկի, տատիկի, հարազատ քրոջ կամ եղբոր) ծննդյան վկայականը կամ անձը հաստատող այլ փաստաթուղթ, որում առկա է ազգությամբ հայ լինելու վերաբերյալ նշում:

Համահայր կամ համամայր եղբոր կամ քրոջ ծննդյան վկայականը կամ ազգությունը հաստատող այլ փաստաթուղթն անձի համար կարող է հանդիսանալ ազգությունը հաստատող փաստաթուղթ, եթե եղբոր կամ քրոջ ազգությամբ հայ լինելը պայմանավորված է նրանց համատեղ ծնողի ազգությամբ: