Փաստ ինֆո

Իջևանի տարածաշրջանում հանրային պաշտպանի գրասենյակի նախկին փաստաբան Ռադիկ Պապյանը, լինելով Է. Քոսակյանի շահերի պաշտպանը, վերջինիս նախնական կալանքից ազատելու պատրվակով նրա հորը դրդել է կաշառք տալ իր ծանոթ պաշտոնատար անձանց և խաբեությամբ հափշտակել 3000 ԱՄՆ դոլար:

2012թ. սեպտեմբերի 14-ին Տավուշի մարզի ընդհանուր իրավասության առաջին ատյանի դատարանը Ռ. Պապյանին մեղավոր է ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 34-178-րդ հոդվածի 2-րդ մասի 2-րդ կետով և 38-34-312-րդ հոդվածի 3-րդ մասի 1-ին կետով` նրան առաջին երկու հոդվածներով դատապարտելով 500 000-ական դրամ տուգանքի, իսկ վերջին հոդվածով` ազատազրկման 3 տարի ժամկետով: Սակայն ՀՀ անկախության հռչակման 20-րդ տարեդարձի առթիվ համաներում հայտարարելու մասին ԱԺ 2011թ. մայիսի 26-ի որոշման կիրառմամբ դատարանը Ռ. Պապյանին ազատել է և՛ տուգանքից, և՛ ազատազրկման ձևով պատիժը կրելուց:

Ռ. Պապյանը բողոքարկել է այդ դատավճիռը` պահանջելով իրեն անպարտ ճանաչել: Դեկտեմբերի 7-ին ՀՀ վերաքննիչ քրեական դատարանը որոշել է վերաքննիչ բողոքը մասնակիորեն բավարարել:

Թերթը ուշագրավ մի հանգամանքի է անդրադառնում. մինչ ընթանում է Ռ. Պապյանի դատավարությունը, նա բաժանվել է իր կնոջից` խարդախության համար դատվող, թոշակառուներից ավելի քան 10մլն. դրամ յուրացրած, Իջևանի զինկոմիսարիատի նախկին պետ Հրանուշ Ներկարարյանից: Ռ. Պապյանը շարունակում է զբաղվել փաստաբանական գործունեությամբ, իրավագիտություն դասավանդում «Գալիք» համալսարանի Իջևանի մասնաճյուղում:

«Նախկինում նա հայտնվել է տարբեր պատմությունների մեջ, սակայն ամեն անգամ «ջրից չոր է դուրս եկել»: Այս անգամ էլ նրան հաջողվեց խուսափել ազատազրկումից և տուգանքներից: Դատախազությունը 1 ամսվա ընթացքում կարող է բողոքարկել վերաքննիչ դատարանի որոշումը»,- գրում է թերթը: