Փաստ ինֆո

ՀՀ ոստիկանության քննչական գլխավոր վարչության Կոտայքի քննչական բաժանմունքում մերժվել է մահվան ելքով վրաերթի գործով տուժող Նարեկ Զարգարյանի իրավահաջորդի ներկայացուցիչ, փաստաբան Երեմ Սարգսյանի միջնորդությունը մեղադրյալ Ալվինա Հարությունյանին առաջադրված մեղադրանքը վերաորակելու մասին: Ինչպես «Փաստինֆո»-ի թղթակցին հայտնեց փաստաբանը, իր միջնորդությունը մերժելու որոշման դեմ բողոք է ներկայացնելու գործով դատավարական հսկողություն իրականացնող դատախազին:

Ալվինա Հարությունյանին մեղադրանք է առաջադրվել ՀՀ քրեական օրենսգրքի 242-րդ հոդվածի երկրորդ մասով՝ Ճանապարհային երթևեկության և տրանսպորտային միջոցների շահագործման կանոնները խախտելու համար, ինչն անզգուշությամբ առաջացրել է մարդու մահ: Տուժող կողմը կտրականապես այս մեղադրանքը չի ընդունում: Ըստ կողմի, Ա. Հարությունյանի արարքը պետք է որակվեր ՀՀ քրեական օրենսգրքի 104-րդ հոդվածի 1-ին մասով՝ սպանություն, ապօրինաբար մեկ ուրիշին դիտավորությամբ կյանքից զրկելը, և 183-րդ հոդվածի երրորդ մասի երրորդ կետով՝ ավտոմեքենային կամ տրանսպորտային միջոցին ապօրինաբար տիրանալը (փախցնելը) առանց հափշտակելու նպատակի, որը կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով:

Քրեական օրենսգրքի 104-րդ հոդվածի 1-ին մասով մեղադրանքը, ըստ տուժողի իրավահաջորդի ներկայացուցչի, պետք է բնորոշվի որպես «անուղղակի դիտավորությամբ կատարված սպանություն»: Ըստ փաստաբանի, ՀՀ քրեական օրենսգրքի 29-րդ հոդվածի առաջին մասը նախատեսում է՝ «դիտավորությամբ կատարված հանցանքը կարող է դրսևորվել ուղղակի կամ անուղղակի դիտավորությամբ», իսկ նույն հոդվածի երրորդ մասի համաձայն, «հանցանքը համարվում է անուղղակի դիտավորությամբ կատարված, եթե անձը գիտակցել է իր գործողության (անգործության) հանրության համար վտանգավոր բնույթը, նախատեսել է հանրության համար վտանգավոր հետևանքների առաջացման հնարավորությունը, չի ցանկացել այդ հետևանքները, բայց գիտակցաբար թույլ է տվել դրանք»:

Ըստ Երեմ Սարգսյանի, քրեական գործի քննությամբ հաստատվել է, որ Ա. Հարությունյանն ավտոմեքենան վարելու ընթացքում հաստատապես իմացել է, որ Նարեկ Զարգարյանը կառչած է ավտոմեքենայի աջ կողնակից: Այդ մասին մեղադրյալը հայտնել է զոհին հիվանդանոց տեղափոխած Էդվարդ Մարգարյանին: Ըստ վերջինիս Ա. Հարությունյանն իրեն ասել է, որ ավտոմեքենան վարելու ընթացքում Ն. Զարգարյանը ամբողջ ճանապարհին գոռացել է. «Մեռա, մեռնում եմ»: Անսթափ վիճակում նվազագույնը 100-120 կմ/ժամ արագությամբ ձմեռվա պայմաններում մոտ 2 կմ տարածություն վարելով, ըստ տուժող կողմի ներկայացուցչի, մեղադրյալը գիտակցել է, որ տուժողը կարող է վայր ընկնել ու մահանալ, սակայն չի կանգնեցրել ավտոմեքենան և «գիտակցաբար թույլ է տվել, որ Նարեկն ուժասպառ լինելով ընկնի ու մահանա»:

Ե. Սարգսյանը հայտնեց նաև, որ Ա. Հարությունյանի արարքի սխալ որակման դեմ բազմիցս բողոքներ է ներկայացրել ՀՀ Նախագահին ու գլխավոր դատախազին, սակայն դրանց պատշաճ պատասխան չի տրվել և բողոքներն ուղարկվել են ետ՝ վարույթն իրականացնող մարմնին: