Փաստ ինֆո

Ազգային ժողովի Էթիկայի հարցերով ժամանակավոր հանձնաժողովը այսօրվա նիստում որոշեց սկսել «Ռազմավարական մշակումներ կենտրոն» ՀԿ-ի դիմումի քննությունը: Գործով ներկայացուցիչ է նշանակվել հանձնաժողովի անդամ, ՀՅԴ խմբակցության ներկայացուցիչ Արծվիկ Մինասյանը: Այդ մասին դռնփակ նիստից հետո լրագրողներին հայտնեց հանձնաժողովի նախագահ Նիկոլ Փաշինյանը:

Ըստ նրա օրակարգում եղել է նաև մեկ այլ դիմում՝ քաղաքացի Մ. Խաժակյանից, որը հանձնաժողովը մերժել է, քանի որ դիմումում ներկայացված խնդիրը որևէ առնչություն չունեն Էթիկայի հանձնաժողովի կողմից քննվող հարցերի հետ և հանձնաժողովի իրավասության շրջանակներից դուրս էր:

Օրակարգային երրորդ հարցը վերաբերում էր հանձնաժողովի կողմից արդեն իսկ քննության վերցված ՀՅԴ խմբակցության ղեկավար Արմեն Ռուստամյանի դիմումի կապակցությամբ ԱԺ նախագահին հարցում ուղարկելուն: Հիշեցնենք, որ դիմումը վերաբերում է ԱԺ 83 պատգամավորների կողմից արտահերթ նիստին չգրանցվելուն և այդպիսով նիստը տապալելուն:

Ինչպես «Pastinfo.am»-ը ավելի վաղ տեղեկացրել էր «Ռազմավարական մշակումներ կենտրոն» ՀԿ-ի տնօրեն Հրանտ Մելիք-Շահնազարյանի ստորագրությամբ ԶԼՄ-ներում հրապարակված դիմումում հանձնաժողովին առաջարկվում է քննության առնել ԱԺ «Բարգավաճ Հայաստան» խմբակցության անդամ Միքայել Մելքումյանի վարքագիծը` հիմք ընդունելով համացանցում հայտնված տեսանյութը:

Ըստ տեսանյութի, ինչպես նշված է դիմումում, «ՀՀ Ազգային ժողովի պատգամավոր ԲՀԿ խմբակցության ներկայացուցիչ Միքայել Մելքումյանը, անձամբ, այն էլ մեծ ոգևորությամբ, պատմում էր, որ հանդիսանում է տարածքների խոշոր սեփականատեր և շարքային բրոքերի նման հեռախոսով բանակցում էր վարձակալության պայմանների շուրջ, առաջարկում էր տարածքներ և ոչ միայն չէր թաքցնում իր ով լինելը, այլ անգամ նշում էր, որ ինքը «ճանաչված այր» է ու իր հետ համագործակցելը «շահավետ» կլինի»։