Փաստ ինֆո

ՀՀ վարչական դատարանի գերծանրաբեռնվածությունը մեղմելու և գործերի քննության միջին ժամկետները համեմատաբար կրճատելու նպատակով նախատեսվում է այս դատարանի դատավորների թիվը ավելացնել 10-ով: Դատական օրենսգրքում ամրագրվում է, որ ՀՀ վարչական դատարանը բաղկացած է նախագահից և 26 դատավորներից` ներկայիս 16 դատավորների փոխարեն:

Այս փոփոխությունը նախատեսված է Ազգային ժողովի կողմից նախօրեին ընդունված` «ՀՀ դատական օրենսգիրքն ուժի մեջ մտնելու մասին» օրենքում և ՀՀ դատական օրենսգրքում փոփոխություններ և լրացում կատարելու մասին կառավարության հեղինակած օրենսդրական փաթեթով:

Ինչպես խորհրդարանի նիստում հայտնեց ՀՀ արդարադատության նախարար Հրայր Թովմասյանը, ՀՀ դատական օրենսգրքում փոփոխություններ և լրացում կատարելու մասին օրենքի անցումային դրույթներով սահմանվում է դատավորների պիտանելիության ցուցակը համալրելու արագացված ընթացակարգ, ինչը հնարավորություն կտա, 6-ամսյա ուսուցման ժամանակահատվածը ներառյալ, արդեն հաջորդ տարվա հոկտեմբեր-նոյեմբեր ամիսներին ցուցակներում ունենալ համապատասխան թվով դատավորների թեկնածուներ և նշանակել նրանց:

2013 թ.-ի հունվարի 1-ից օրենքն ուժի մեջ մտնող օրենքով կարգավորվում են նաև դատավորի կենսաթոշակի հետ կապված հարցերը: Մասնավորապես, նախատեսվում է դատավորի պաշտոնում նշանակմանը խոչընդոտող ֆիզիկական արատ կամ հիվանդություն ձեռք բերելու հիմքով լիազորությունները դադարեցրած նախկին դատավորին վճարել կենսաթոշակ լիազորությունների դադարեցման պահից՝ հաշմանդամության կենսաթոշակից օգտվելու, այլ ոչ թե` տարիքային կենսաթոշակի հասնելու պահից:

ՀՀ դատական օրենսգիրքը լրացվել է նոր` 75.1-րդ հոդվածով`«Դատավորի պաշտոն զբաղեցրած անձի կենսաթոշակային ապահովությունը»: Ըստ այդմ, մասնավորապես, սահմանվում է, որ որպես դատավոր առնվազն 10 տարի պաշտոնավարած անձին, ում լիազորությունները դադարեցվել են ֆիզիկական արատի կամ հիվանդության, ինչպես նաև նրա 65 տարին լրանալու հիմքերով, նշանակվում է կենսաթոշակ՝ վերջին 1 տարվա ընթացքում որպես դատավոր զբաղեցրած պաշտոնի համար ստացած միջին աշխատավարձի ընդհանուր գումարի և զրո ամբողջ ինը տասնորդական գործակցի արտադրյալի 55 տոկոսի չափով։ Դատավորի պաշտոն զբաղեցրած անձին նշանակված կենսաթոշակի չափը չի կարող գերազանցել որպես դատավոր զբաղեցրած վերջին պաշտոնի համար ՀՀ դատական օրենսգրքի 75-րդ հոդվածով սահմանված պաշտոնային դրույքաչափի 92 տոկոսը։