Փաստ ինֆո

Թերթը հիշեցնում է 2010թ. սեպտեմբերի 4-ի գիշերը Իջևանի Գանձաքարի նախկին գյուղապետ Անաստաս Հակոբյանի անասուններին թունավորելու դեպքը, որի արդյունքում նրան պատճառվել էր 5,5 մլն դրամի վնաս:

Ա. Հակոբյանը Իջևանի հակակոռուպցիոն կենտրոնին տեղեկացրել էր, որ դեպքի մասին ինքը նույն օրը հաղորդել է ոստիկանության Իջևանի բաժնին, սակայն այդ օրը նրա հաղորդումը ոստիկանությունում չեն ընդունել և համապատասխան միջոցներ չեն ձեռնարկել:

Ա. Հակոբյանն իր սեփական նախաձեռնությամբ նմուշներ է վերցրել սատկած անասուններից և տարել անասնաբուժական համաճարակային ախտորոշիչ կենտրոն, որից հետո ստացված արդյունքները ներկայացրել է ոստիկանություն, ինչի արդյունքում ոստիկանությունում նյութերը գրանցել են:

Ա. Հակոբյանը պատմում է, որ դեպքից մեկ ամիս անց քննիչը փոխվել է և քրեական գործի վարույթը կասեցվել: Տուժողն ինքը ձեռնարկել է գործի բացահայտման միջոցառումներ: Նա գրավոր դիմել է Իջևանի ոստիկանության և Տավուշի քննչական բաժիններ` նշելով այն վկայի անունը, որի միջոցով գործը կարող է բացահայտվել, սակայն վկան չի հրավիրվել և չի հարցաքննվել:

Թերթը գրում է, որ 2012թ. հունվարին Իջևանի երկու բնակիչներ գրավոր հայտարարություն են ներկայացրել Ա. Հակոբյանին, որ լուրեր ունեն այն մասին, թե նրա անասուններն ում միջոցով են թունավորվել:

Այնուհետև` Ա. Հակոբյանը դիմել է Իջևանի հակակոռուպցիոն կենտրոն, որտեղից դիմումն ուղարկվել է ՀՀ գլխավոր դատախազին: Գլխավոր դատախազությունից դիմումն ուղարկվել է Տավուշի մարզի դատախազություն, իսկ 2012թ. օգոստոսի 8-ին Տավուշի մարզի դատախազի տեղակալ Ա. Գևորգյանը` մարզի քննչական բաժին:

Ա. Հակոբյանը թերթի թղթակցին հայտնել է, որ ներկայումս քրեական գործի նախաքննությունը շարունակվում է և այս քրեական գործով զբաղվում է արդեն երրորդ քննիչը` ավելացնելով, որ ինքը ցուցմունք է տվել, հայտնել բացահայտման համար կարևոր անուններ, փաստեր, նշել 3-4 վկաների անուններ, սակայն ոստիկանությունը, ըստ էության, չի զբաղվում գործի քննությամբ: