Փաստ ինֆո

Ազգային ժողովի դեկտեմբերի 19-ին 70 «կողմ» և 6 «դեմ» ձայներով երկրորդ ընթերցմամբ և ամբողջությամբ ընդունվեց վերջին երեք օրերին բուռն քննարկման արժանացած ԱԺ կանոնակարգ-օրենքում փոփոխությունների նախագիծը:

Քվեարկության դրված նախագծից, ինչպես նախապես հայտարարեց հիմնական զեկուցող Արփինե Հովհաննիսյանը, քաղաքական ուժերի հետ կայացած պայմանավորվածությունների համաձայն, հանվել է ընդդիմախոսների հիմնական թիրախ հանդիսացած վետոյի իրավունքը, ըստ որի Էթիկայի հանձնաժողովի որոշումները և եզրակացությունները պետք է ընդունվեին, եթե որոշմանը կողմ քվեարկեին ոչ ընդդիմադիր և ընդդիմադիր խմբակցությունները ներկայացնող առնվազն մեկական անդամներ:

Հիշեցնենք, որ հանրապետական պատգամավորներ Դավիթ Հարությունյանի և Արփինե Հովհաննիսյանի օրենսդրական նախաձեռնությամբ, մասնավորապես, Էթիկայի հանձնաժողովում քաղաքական հավասարակշռություն հաստատելու նպատակով վերանայվում է վերջինիս կազմավորման կարգը:

Ըստ այդմ, հանձնաժողովում ընդդիմությունն ու իշխանությունը պետք է ունենան հավասար թվով տեղեր: Բացի այդ, մեկ ներկայացուցիչ կունենա նաև այն խմբակցությունը, որը ոչ ընդդիմություն է, ոչ էլ` իշխանություն: Ներկայումս այդպիսի խմբակցություն է «Բարգավաճ Հայաստան»-ը:

Սա նշանակում է, որ փոփոխությունների ընդունման արդյունքում ընդդիմադիր երեք խմբակցությունները և «Բարգավաճ Հայաստան»-ը կշարունակեն ներկայացված լինել մեկական անդամով, իսկ քաղաքական կոալիցիայի երկու ուժերը` ՀՀԿ-ն և «Օրինաց երկիր»-ը, ներկայիս երկու անդամի փոխարեն հանձնաժողովում ընդհանուր առմամբ կունենան երեք անդամ:

Նախագծին կողմ էին քաղաքական կոալիցիայի մաս կազմող` ՀՀԿ և «Օրինաց երկիր», դեմ` ՀՅԴ խմբակցությունները: «Հայ ազգային կոնգրես», «Ժառանգություն» և «Բարգավաճ Հայաստան» խմբակցությունները քվեարկությանը չմասնակցեցին:

ՀՅԴ-ն, «Ժառանգություն»-ը և «Բարգավաճ Հայաստան»-ը հայտարարեցին, որ իրենց ներկայացուցիչները կշարունակեն մասնակցել հանձնաժողովի աշխատանքներին, իսկ «Հայ ազգային կոնգրես»-ն իր հետագա մասնակցության հարցը դեռ կքննարկի:

«Հայ ազգային կոնգրես»-ի անդամ Նիկոլ Փաշինյանը, ով այս նստաշրջանում Էթիկայի հանձնաժողովի նախագահն է, հայտարարեց, որ, «ըստ էության, քվեարկության է դրվում բոլորովին նոր նախագիծ` առանց մեծամասնության նախնական հավակնությունների, որը, նախնական տպավորությամբ, Էթիկայի հանձնաժողովում այսօր առկա իրավիճակը դե ֆակտո որևէ կերպ չի փոխում»: