Փաստ ինֆո

Երևանի Ավան և Նոր Նորք վարչական շրջանների դատարանում՝  դատավոր Դավիթ Հարությունյանի նախագահությամբ, «Հարսնաքար» ռեստորանային  համալիրի տարածքում բռնարարքի գործով այսօրվա նիստում սկսվեց վկաների հարցաքննությունը: Դրան, ինչպես հայտնի է, նախորդել էր տուժողների հարցաքննությունը:

Վկաների հարցաքննությունը  սկսվեց  «Դավիթ ԴՎՍ» ՍՊԸ  (որին պատկանում է «Հարսնաքար» ռեստորանային համալիրը) տնօրեն  Հրաչյա Զոհրաբյանի հարցաքննությամբ:

Վկան նշեց, որ տուժողները ագրեսիվ, հարբած են եղել, իրենց   լավ  չեն  պահել, հայհոյանքներ են տվել, ինչն ի վերջո  վեճի  է հանգեցրել: Մասնավորապես, ամբաստանյալներ Դավիթ Ադամյանի և Նորայր Հայրապետյանի ներկայացմամբ, իրենք հարվածել են այն բանից հետո, երբ  իրենց հայհոյել են: Վկան հայտնեց նաև, որ կանխարգելիչ միջոց է կիրառել և հրահանգել է փոխել մատուցողին՝ Դավիթ Ադամյանին,  սակայն ավելի ուշ տուժողները  խնդրել են, որպեսզի իրենց սպասարկի հին մատուցողը:

Ըստ ՍՊԸ տնօրենի,  ամբաստանյալներն իրեն հայտնել են, որ «վիճաբանություն է եղել, բաժանվել են, և  տուժողները հեռացել են»:  Այն հարցին, թե իրեն չե՞ն հայտնել ինչպես են տուժողները հեռացել համալիրից, չե՞ն ասել, որ հեռացողների մեջ ծանր վնասվածք ստացող է եղել, ով իր ոտքով չի հեռացել (տուժող Վահե Ավետյանը ստացած ծանր  վնասվածքներից 12 օր անց մահացել էր հիվանդանոցում )՝  վկան  հայտնեց, որ վիճաբանության հետևանքների մասին իմացել է հաջորդ օրը:

Վկայի հարցաքննությունը կշարունակվի  դեկտեմբերի 21-ին:

Իսկ «վաղը ևեթ» դատարանը կդիմի  Հանրային պաշտպանի գրասենյակ, որպեսզի ամբաստանյալ  Դավիթ Ադամյանին պաշտպանելու համար գործում ներգրավվի ևս մեկ պաշտպան՝  ներկայիս պաշտպան  Սերգեյ Մկրտչյանի հետ համատեղ՝ վերջինս դեկտեմբերի 25-ից  մինչև  2013թ. հունվարի 30-ը հերթական արձակուրդի մեջ է գտնվելու և այդ  ժամանակահատվածում չի մասնակցելու դատաքննությանը: