Փաստ ինֆո

Ազգային ժողովը արտահերթ նստաշրջանի այսօրվա նիստում ավարտեց ԱԺ կանոնակարգ-օրենքում փոփոխություններ և լրացումներ կատարելու մասին հանրապետական պատգամավորներ Դավիթ Հարությունյանի և Արփինե Հովհաննիսյանի օրենսդրական նախաձեռնության երկրորդ ընթերցմամբ քննարկումը: Քվեարկությունը տեղի կունենա առաջիկա ժամերին:

Նախագծով, մասնավորապես, Էթիկայի հանձնաժողովում քաղաքական հավասարակշռություն հաստատելու նպատակով վերանայվում է վերջինիս կազմավորման կարգը:

Ինչպես նշեց հիմնական զեկուցող Արփինե Հովհաննիսյանը, Էթիկայի հանձնաժողովի հիմնական գաղափարախոսությունը հետևյալն է. «քաղաքական հավասարակշռություն` ապաքաղաքական որոշումներ ընդունելու համար»:

Ըստ այդմ, խմբակցությունները կպահպանեն Էթիկայի հանձնաժողովում առնվազն մեկ պատգամավոր ներկայացնելու իրավունքը, սակայն հանձնաժողովում ընդդիմությունն ու իշխանությունը պետք է ունենան հավասար թվով տեղեր: Բացի այդ, մեկ ներկայացուցիչ կունենա նաև այն խմբակցությունը, որը ոչ ընդդիմություն է, ոչ էլ` իշխանություն: Ներկայումս այդպիսի խմբակցություն է «Բարգավաճ Հայաստան»-ը:

ԱԺ կանոնակարգ-օրենքում ամրագրվում է նաև, որ Էթիկայի հանձնաժողովի որոշումները և եզրակացություններն ընդունվում են հանձնաժողովի անդամների ձայների մեծամասնությամբ, եթե քվեարկությանը մասնակցել է հանձնաժողովի անդամների ընդհանուր թվի կեսից ավելին և որոշմանը կողմ են քվեարկել ոչ ընդդիմադիր և ընդդիմադիր խմբակցությունները ներկայացնող առնվազն մեկական անդամներ:

«Այս նախագիծը իրոք քաղաքական պատվեր չէ, այն չի պարունակում վրիժառության էլեմենտներ և ոչ էլ կուլիսային դրդապատճառներից է բխում: Էթիկայի հանձնաժողովում տեղի ունեցած վերջին իրադարձությունները, գուցե, խթան հանդիսացան այս փոփոխությունները ձեռնարկելու համար, սակայն պահն էր հասունացել, և սա միայն դրդապատճառ էր, ոչ թե` առիթ»,-եզրափակիչ ելույթում ընդգծեց Ա. Հովհաննիսյանը` հավելելով. «Մի շարք ուժեր այստեղ տեսան քաղաքական ենթատեքստ, իսկ որոշ անձինք էլ` իրենց անձնական վերաբերմունքն ուղղորդելու դրդապատճառ»:

Ինչպես «Pastinfo.am»-ը նախօրեին հայտնել էր, այս նախագիծը բավականին բուռն քննարկման արժանացավ: «Հայ ազգային կոնգրես» և ՀՅԴ խմբակցությունների ներկայացուցիչներն անընդունելի համարեցին ընթացքում «խաղի կանոնների» փոփոխությունը և անիմաստ համարեցին այլևս իրենց մասնակցությունն այս հանձնաժողովում:

«Ներկայացված ձևակերպումները, վստահաբար կարող եմ պնդել, ձախողելու են հանձնաժողովի աշխատանքները, իսկ մենք չենք ուզում մասնակցել այդ ձախողումներին»,- նախօրեին մասնավորապես նշել էր հանձնաժողովի կազմում ՀՅԴ-ն ներկայացնող Արծվիկ Մինասյանը` հայտարարելով. «Կարողացեք ինքներդ էլ ձևավորել Էթիկայի հանձնաժողով, ինքներդ էլ գնահատեք պատգամավորների վարքագիծը»: