Փաստ ինֆո

Վերջին օրերին առատ ձյան տեղումները մայրաքաղաքի փողոցները դժվարանցանելի են դարձրել, սակայն այսօր լրագրողների հետ հանդիպման ժամանակ ԱԻՆ ճգնաժամային կառավարման կենտրոնի պետ Հովհաննես Խանգելդյանը մաքրման աշխատանքները բավարար գնահատեց, հավելելով, որ դեռ չեն գրանցվել երթևեկության «պարալիզացման» փաստեր:

Ըստ Հովհաննես Խանգելդյանի՝ հանրապետության տարածքում ձյան մաքրման աշխատանքները դժվարանում են առատ տեղումների պատճառով:

«Հանրապետությունում այս պահի դրությամբ փակ է Սելիմի լեռնանցքը, կան դժվարանցանելի հատվածներ, կատարվում են ակտիվ մաքրման աշխատանքներ»,- ասաց ԱԻՆ հիդրոմետ ծառայության օդերևութաբանական կանխատեսումների բաժնի պետ Գագիկ Սուրենյանը, հավելելով, որ այսօրվա ընթացքում դեռ կպահպանվի դժվարանցանելի վիճակը՝ պատճառը տեղացող ձյունն է:

«Սովորաբար ձմռան շրջանում գրանցվում է արտակարգ պատահարների աճ, այս տարի ևս դեկտեմբերի 19-ի դրությամբ ճանապարհատրանսպորտային պատահարների թիվն աճել է»,- նշեց Հովհաննես Խանգելդյանը:

Ինչ վերաբերում է հանրապետության տարածքում եղանակակլիմայական լուրջ շեղումներին, ԱԻՆ հիդրոմետ ծառայության օդերևութաբանական կանխատեսումների բաժնի պետ Գագիկ Սուրենյանը նշեց, որ «լուրջ շեղումներ չկան, տարեկան կտրվածքով նկատվում է օդի ջերմաստիճանի բարձրացում: Ընդհանուր առմամբ և՛ ջերմաստիճանը, և՛ տեղումների քանակը բազմամյա կլիմայական նորմատիվներով էական շեղումներ չեն տալիս»:

Մայրաքաղաքում ձյան շերտի բարձրությունը հասնում է 10-15 սանտիմետրի: Այսօր և վաղը հանրապետությունը դեռևս կգտնվի ցիկլոնի ազդեցության գոտում, հատկապես արևմտյան հատվածներում կտեղա ձյուն, իսկ 20-ին և 21-ին կդիտվի ջերմաստիճանի բարձրացում՝ 2-4 աստիճանով:

ԱԻՆ ճգնաժամային կառավարման կենտրոնի պետը կոչ արեց ազգաբնակչությանը հեռավոր ճանապարհներ դուրս գալուց առաջ նախապես ծանոթանալ ավտոճանապարհային ցանցում տիրող իրավիճակին, ինչպես նաև առաջիկա 10-15 օրերին խուսափել հնամաշ անվադողերով և անսարք տրանսպորտային միջոցներով ճանապարհ դուրս գալուց, քանի որ դրանք դառնում են խցանումների և վթարների պատճառ: