Փաստ ինֆո

Թերթը գրում է. «Երևանի բնակիչ, 53-ամյա Գարիկ Կապզմալյանի «սև օրերն» սկսվել են այն ժամանակ, երբ աշխատանք չունենալու պատճառով որոշել է անձնական օգտագործման ավտոմեքենան վարձակալության տալ և համապատասխան հայտարարություն է տպագրել «Գինդ» շաբաթաթերթում»:

Հայտարարությամբ Գ. Կապզմալյանին զանգահարած Հայկ Ահարոնյանը, ով հանդիպման է եկել Արմեն Հովակիմյանի հետ, այլ նպատակ է հետապնդել: Կողմերը պայմանավորվում են, որ յուրաքանչյուր 10 օրը մեկ պետք է հանդիպեն և Հ. Ահարոնյանը պետք է վճարի վարձակալության` պայմանավորված գումարը: Ի դեպ, Արմեն Հովակիմյանը զինվորական է և մայորի կոչում ունի:

Սակայն որոշ ժամանակ անց Գ. Կապզմալյանը հասկանում է, որ խաբված է, քանի որ Հ. Ահարոնյանը մեկ-երկու հանդիպումից հետո անհետանում է:

Մայիսի 16-ին Գ. Կապզմալյանը դիմում է ոստիկանության Նոր Նորքի բաժին: Հարուցվում է քրեական գործ, որի շրջանակներում քննիչ Ն. Հարությունյանը պարզում է, որ Հ. Ահարոնյանը խոշոր չափի գումար է պարտք Ա. Հովակիմյանին և նրանք, համաձայնության գալով, վերցրել են Գ. Կապզմալյանի մեքենան ու նույն օրը տարել են Արարատի մարզ, տվել Գեղամ Մարտիրոսյանին, նրանից վերցրել 3000 ԱՄՆ դոլար գումար, ինչը Ա. Հովակիմյանը վերցրել է` որպես իր պարտքի մի մաս:

Հայկը ձերբակալվում է, իսկ Ա. Հովակիմյանի մասով գործն ուղարկվում է ՊՆ քննչական բաժին:

Ըստ թերթի` զինվորական քննիչ Փիլիպոսյանը Գ. Կապզմալյանի հետ զրույցի ժամանակ նրան համոզում է, որ Արմեն Հովակիմյանն այս գործում մեղք չունի, չի իմացել իր ընկերոջ մտադրությունների մասին: Քննիչը նաև տեղեկացնում է, որ նա` Հովակիմյանը, նոր անուններ է տալիս և վստահեցնում, որ իրենք ամեն ինչ անում են` մեքենան գտնելու համար:

Նոյեմբերի 11-ին քննիչ Փիլիպոսյանը զանգում է մեքենայի տիրոջը և հայտնում, որ մեքենան գտնվել է: Գ. Կապզմալյանը մեքենան տեսնում է թալանված:

«5 ամիս գործը քննելուց հետո կայացրել են անօրինական որոշում. Արմեն Հովակիմյանին ազատել են պատասխանատվությունից, մեքենան թալանած Գեղամ Մարտիրոսյանի նկատմամբ կիրառվել է անօրինական համաներում և երկուսին շնորհվել է վկայի կարգավիճակ` ամբողջ մեղքը բարդելով Հայկ Ահարոնյանի վրա»,- նշում է թերթը: