Փաստ ինֆո

Ազգային ժողովի դեկտեմբերի 18-ին 66 «կողմ», 28 «դեմ» և 1 «ձեռնպահ» ձայներով առաջին ընթերցմամբ ընդունեց նախօրեին բուռն քննարկման արժանացած` ԱԺ կանոնակարգ-օրենքում փոփոխությունների նախագիծը:

Նախագծի համահեղինակ` հանրապետական Արփինե Հովհաննիսյանը քվեարկությունից առաջ հայտնեց, որ նախագծի վերաբերյալ ԱԺ նախագահ Հովիկ Աբրահամյանի նախաձեռնությամբ հրավիրված խորհրդակցության արդյունքում խմբակցությունների ներկայացուցիչները առայժմ վերջնական պայմանավորվածություն ձեռք չեն բերել: «Այս պահի դրությամբ դեռևս ընթանում են քննարկումները: Հստակ պայմանավորվածություն չկա, բայց պայմանավորվածության եզրեր, կարծում եմ, կկարողանանք գտնել»,-հայտարարեց նա:

Նախագծին կողմ էին քաղաքական կոալիցիայի մաս կազմող` ՀՀԿ և «Օրինաց երկիր», դեմ` «Հայ ազգային կոնգրես», ՀՅԴ, «Ժառանգություն» և «Բարգավաճ Հայաստան» խմբակցությունները: Վերջինիս անունից Ստեփան Մարգարյանը հայտնեց, որ խմբակցությունը «հիմա դեմ է քվեարկում, բայց, կարծես թե, ուրվագծվում են ինչ-որ բաներ, երկրորդ ընթերցման ժամանակ կքննարկենք»: ԲՀԿ-ական պատգամավորը վստահեցրեց, որ իրենք պատրաստ են շարունակել բանակցությունները:

Ի դեպ` խորհրդակցությանը չի մասնակցել միայն «Հայ ազգային կոնգրես»-ի ներկայացուցիչը:

Հիշեցնենք, որ հանրապետական պատգամավորներ Դավիթ Հարությունյանի և Արփինե Հովհաննիսյանի օրենսդրական նախաձեռնությամբ, մասնավորապես, առաջարկվում է Էթիկայի հարցերով ժամանակավոր հանձնաժողովում քաղաքական հավասարակշռություն հաստատելու նպատակով վերանայել վերջինիս կազմավորման կարգը:

Բացի այդ, նախատեսվում է, ի լրումն առկա պայմանների, ամրագրել նաև, որ հանձնաժողովների որոշումներն ընդունվելու համար անհրաժեշտ է, որպեսզի կողմ քվեարկեն ոչ իշխանական և իշխանական խմբակցությունները ներկայացնող առնվազն մեկական անդամներ: Ներկայումս հանձնաժողովի որոշումները և եզրակացություններն ընդունվում են քվեարկությանը մասնակցած հանձնաժողովի անդամների ձայների մեծամասնությամբ, եթե քվեարկությանը մասնակցել է հանձնաժողովի անդամների ընդհանուր թվի կեսից ավելին: