Փաստ ինֆո

Թերթը գրում է, որ Կոտայքի մարզի ընդհանուր իրավասության առաջին ատյանի դատարանում շուտով կավարտվի մարզի զինկոմիսարիատի աշխատակիցներին «ծեծելու» գործը: Ամբաստանյանլներն են` 22-ամյա Հարություն Մանուկյանը, նրա մայրը` Մարիետա Մանուկյանը, և մորաքույրը` Կարինե Մանուկյանը: Ըստ քրեական գործի նյութերի` նրանք խմբակային հարձակում են իրականացրել զինկոմիսարիատի վրա: Նրանց մեղադրանք է առաջադրվել խուլիգանության համար:

Ըստ մեղադրական եզրակացության` Հ. Մանուկյանը զինվորական ծառայությունն ավարտելուց հետո գնացել է զինկոմիսարիատ` զինվորական գրքույկը վերցնելու: Սակայն ինչ-ինչ պատճառներով գրքույկի հանձնումը ձգձգվել է, ինչը նրան շատ է զայրացրել և 2011թ. օգոստոսի 3-ին` Հարությունը մոր և մորաքրոջ հետ գնացել է ՊՆ Կոտայքի զինկոմիսարիատ: Հ. Մանուկյանի մորաքույրն ապտակել է զինկոմիսարիատի աշխատակիցներին և հայհոյել:

Այնուհետև Կ. Մանուկյանը վերցրել է երկաթե ձող, վերադարձել զինկոմիսարիատ` փոորձելով հարվածել զինկոմի տեղակալ, փոխգնդապետ Պ. Մեղրյանին:

Սակայն թերթի թղթակցի հետ զրույցում Կ. Մանուկյանը` Հ. Մանուկյանի մորաքույրը, ասել է. «Ընտենց բան չի եղե: Ինքը` էդ Մեղրյանը, համ ինձ տփե, համ էլ մարմնական վնասվածք ա տվե, համ էլ էդ իրա տասը հոգուն ասում ա ` խփեք, խփեք, ես ընենց թիկունք ունեմ, տեր եմ»:

Կ. Մանուկյանը հավելել է, որ իրենց իրավունքները ոտնահարվել են և իրենք դիմել են ՀՀ մարդու իրավունքների պաշտպանին: