Փաստ ինֆո

Թերթը հիշեցնում է, որ հոկտեմբերի 18-ին «Էթնա» ռեստորանային համալիրին հարող տարածքում սպանվել էր 27-ամյա Արսեն Շահբազյանը, ով «Սուրբ Գրիգոր Լուսավորիչ» բժշկական կենտրոն էր տեղափոխվել «որովայնի ձախակողմյան շրջանի ծակած վերք» ախտորոշմամբ:

Դեպքի առթիվ ՀՀ ոստիկանության ՔԳՎ Արաբկիրի քննչական բաժնում հոկտեմբերի 19-ին հարուցվել էր քրեական գործ` ՀՀ քրեական օրենսգրքի 104-րդ հոդվածի 1-ին մասով:

«Առավոտ»-ի հետ զրույցում տուժողի իրավահաջորդի ներկայացուցիչ, ՀՀ փաստաբանների պալատի անդամ Վարդուհի Էլբակյանը տեղեկացրել է, որ կատարվում է նախաքննություն և 6 անձի` Կարեն, Արմեն, Վաղինակ Հարությունյանների, Անուշավան Հովհաննիսյանի, Սերգեյ Հարությունյանի և Մ. Խառատյանի նկատմամբ որպես խափանման միջոց ընտրվել է կալանավորում: Նշված անձանցից Մ. Խառատյանն ու Վ. Հարությունյանը հետախուզման մեջ են:

Վ. Էլբակյանի փոխանցմամբ` տուժողի իրավահաջորդը` հայրը, դիմել է ՀՀ նախագահին, ՀՀ գլխավոր դատախազին, ՀՀ ոստիկանապետին` արարքի քրեաիրավական որակումը ճիշտ չտալու համար: Ըստ դիմումատուի` այն պետք է որակվեր խուլիգանական դրդումներով կատարված սպանություն:

Փաստաբան Վ. Էլբակյանը թերթի թղթակցի հետ զրույցում տեղեկացրել է նաև, որ Արաբկիրի դատախազի կողմից որոշում է կայացվել` Ա. Հովհաննիսյանին, Կ. և Ա. Հարությունյաններին կալանքից անհապաղ ազատելու և որպես խափանման միջոց ստորագրություն չհեռանալու մասին ընտրելու վերաբերյալ:

Նոյեմբերի 12-ին նրանց խափանման միջոցը փոխվել է: