Փաստ ինֆո

ՀՀ  Սահմանադրական դատարանն այսօր հրապարակեց քաղաքացիներ  Սամվել Մնացականյանի և  Գևորգ Գյոզալյանի դիմումների հիման վրա միավորված գործով իր որոշումը:  Քաղաքացիները  վիճարկում էին  ՀՀ Դատական օրենսգրքի 111-րդ հոդվածի՝  Արդարադատության խորհրդի ակտերը և դրանց ընդունման կարգը,  6-րդ մասի, 155-րդ հոդվածի՝ Դատավորի նկատմամբ կարգապահական վարույթ հարուցելը,   5-րդ մասի 2-րդ կետի և 158-րդ հոդվածի՝  Դատավորին կարգապահական պատասխանատվության ենթարկելու վերաբերյալ առաջարկի քննությունը,   1-ին մասի դրույթների սահմանադրականությունը: Գործը քննվում էր գրավոր ընթացակարգով:

ՀՀ ՍԴ որոշմամբ, 111-րդ հոդվածի  6-րդ մասը,  155-րդ հոդվածի  5-րդ մասի 2-րդ կետը և 158-րդ հոդվածի  1-ին մասը  համապատասխանում են ՀՀ Սահմանադրությանը: Որոշման մեջ ներկայացված սահմանադրաիրավական   բովանդակության շրջանակներում նշվեց, որ  ՀՀ Արդարադատության խորհրդի կարգապահական հանձնաժողովը պարտավոր է անձի դիմումը մերժելու դեպքում ողջամիտ իր պատասխանում հիմնավորել վարույթ չհարուցելու պատճառները:

Միաժամանակ  ՀՀ Սահմանադրական դատարանը դիմող Գ.Գյոզալյանի գործով որոշեց, որ վերջնական դատական ակտը նոր հանգամանքների հիմքով օրենքով սահմանված կարգով ենթակա է վերանայվելու:
ՀՀ ՍԴ նախագահ Գագիկ Հարությունյանը՝ հրապարակելով ՍԴ որոշումը,  հավելեց, որ Սահմանադրական դատարանը համակարգային խնդիր տեսնում է, այն չի թաքնված  օրենքի կետի ու օրենքի լուծումների մեջ,  այլ խնդիրը սահմանադրական բնույթի է, և ՍԴ-ն որոշման մեջ այդ ասպեկտին նույնպես անդրադարձել է (այսօր հրապարակվեց 18 էջ կազմող ՍԴ որոշման եզրափակիչ մասը, որոշումն ամբողջությամբ մոտակա օրերին կտեղադրվի ՍԴ պաշտոնական կայքէջում):

ՀՀ փաստաբանների պալատի անդամ, փաստաբան Գևորգ Գյոզալյանը «Փաստինֆո»-ի թղթակցի հետ զրույցում  նշեց, որ ՍԴ  որոշումն իրեն «այս պահի դրությամբ» բավարարում է: Նա հավելեց, որ ՍԴ որոշման մեջ տեղ գտած իրավական դիրքրոշմանը ծանոթանալուց հետո միայն կարող է  համակարգված ներկայացնել  իր դիրքորոշումը:  Փաստաբանը հայտնեց, որ   կրկին հայցադիմում է ներկայացնելու Վարչական դատարան՝ պահանջելով, որպեսզի Արդարադատության խորհուրդը պատճառաբանված որոշում տա իր հայցադիմումի վերաբերյալ, մասնավորապես, թե  ինչո՞ւ   Երևանի Կենտրոն և Նորք-Մարաշ վարչական շրջանների դատարանի դատավոր Էդիկ Ավետիսյանի նկատմամբ  կարգապահական վարույթ չեն հարուցել:  Է.Ավետիսյանը, ըստ Գ.Գյոզալյանի,  նախկին դատավոր Վլադիմիր Գրիգորյանի գործով ապացույցները չէր հետազոտել: «Մենք այս հիմքով գնացինք մինչև Վճռաբեկ դատարան, որն ի զարմանս մեզ, այդ ակնհայտ խախտման վրա աչք փակեց, որից հղացավ Արդարադատության խորհուրդ դիմելու միտքը, որպեսզի կարգապահական վարույթ հարուցեն և պատասխանատվության ենթարկեն Է.Ավետիսյանին»,- ասաց փաստաբանը՝ հավելելով, որ   ԱԽ-ն երկու բառով մերժեց այն հիմնավորմամբ, որ ԱԽ-ն չի գտել  կարգապահական գործ հարուցելու հիմքեր:  Վարչական դատարանի բոլոր ատյանները վերադարձրել էին Գ.Գյոզալյանի հայցադիմումը, ինչին էլ հետևել էր  փաստաբանի դիմումը ՍԴ: