Փաստ ինֆո

Դեկտեմբերի 8-ին ՀՀ ոստիկանության Ավանի բաժանմունքում օպերատիվ տեղեկություններ են ստացվել այն մասին, որ Ավանի Աճառյան փողոցի թիվ 30 շենքի 37-րդ բնակարանում սպանություն է տեղի ունեցել, իսկ կատարողը փորձում է թաքցնել դիակը: Օպերատիվ խումբն անմիջապես դեպքի վայր մեկնելով, հայտնաբերել է 1949 թ. ծնված Շուրա Աբրահամյանի դիակը գլխի մասում բռնության հետքերով: Նույն օրը հիշյալ բնակարանից ոստիկանության Ավանի բաժանմունք սպանության կասկածանքով բերման է ենթարկվել 1959 թ. ծնված Ռոբերտ Մելքոնյանը: ՀՀ ոստիկանության տարածած տեղեկատվության համաձայն` պարզվել է, որ դեկտեմբերի 6-ի լույս 7-ի գիշերը Ռ. Մելքոնյանն ընկերոջը` Շուրա Աբրահամյանին, հերթական անգամ հրավիրել է իր հարկի տակ խմելու: Ջրով բացված բժշկական սպիրտը խմելու ու գնալով թեժացող գինարբուքի ընթացքում Շ. Աբրահամյանը ձեռնափայտով պատահաբար խփել է ջահին, որից այն տապալվել է: Ռ. Մելքոնյանի զայրույթն էլ ավելի է մեծացել, երբ ընկերը դրանից հետո կոտրել է սկահակը: Տանտերը սկզբում դժգոհել, հետո Շ. Աբրահամյանի ձեռնափայտը վերցնելով, սկսել է անկանոն հարվածել նրան: Ընկերն ընկել է գետնին, իսկ Ռ. Մելքոնյանն անտեսելով դա, շարունակել է խմել: Միայն որոշ ժամանակ հետո է ձայն տվել նրան:

«Ձեն տվի` Շուրիկ, Շուրիկ ել, մի թաս էլ խմենք, տեսա իրար չի գալի, հետո պուլս-մուլսը նայի, տեսա արդեն սառած է»,- ոստիկանությունում կատարվածն այսպես է պատմել Ռ. Մելքոնյանը:

Ընկերոջ վրա ձեռնափայտ բարձրացրածը հետագայում, ոստիկանության բաժանմունքում հիշել է, որ շատ են խմել ընկերության կենացը: Ռ. Մելքոնյանը կալանավորվել է, կատարվում է նախաքննություն: Կերուխումը կամ, ավելի ճիշտ, ալկոհոլի չարաշահումը մեր իրականության մեջ հերթական անգամ, ցավոք, ավարտվել է ողբերգությամբ: