Փաստ ինֆո

Ս/թ նոյեմբերի 28-ին մեր կայքում հրապարակված «Դեղերի մասին» օրենքը չի կարգավորում կենսահավելումների շրջանառությունը» հրապարակմանն արձագանքել է «Արմենիավիժն» ընկերությունը:

Հիշեցնենք, որ նշված հրապարակման մեջ անդրադարձ էր կատարվել ՀՀ ԱՆ Դեղերի և բժշկական տեխնոլոգիաների փորձագիտական կենտրոնի կողմից վերջին տարիներին հայտնաբերված կեղծման դեպքերին, որոնք հիմնականում վերաբերում են կենսաակտիվ հավելումներին, ինչպես նաև ներկայացվել էր կենտրոնի փոխտնօրենի կարծիքն այն մասին, որ «կենսաակտիվ հավելում արտադրողները տարբեր քիմիական նյութեր ավելացնելու ճանապարհով փորձում են գրավել սպառողին՝ դրանք գովազդելով որպես բուժամիջոց»:

Անդրադառնալով վերը ներկայացված տեսակետին՝ ընկերության տնօրեն Հ. Խորոզյանը նշել է.

«Մեր կարծիքով՝ նման ընդհանուր մեկնաբանումը կարող է ստվերել բարեխիղճ արտադրողների հեղինակությունը:

Անդրադառնալով կենսաբանական հավելումների Հայաստան անարգել ներկրմանը և «Դեղերի մասին» գործող օրենքով դրանց ոչ կարգավորված լինելուն, նշեմ, որ 2012թ. փետրվար ամսից, մեր կարծիքով, ՀՀ-ում ԿԱՀ-երի շրջանառությունը կարգավորվում է օրենքով:

Հոդվածում նշված է, որ ԿԱՀ-երի մասին առանձին նոր օրենքի շրջանակներում արտադրանքը մինչև շուկա մտնելը Հայաստանում պետք է ենթարկվի փորձաքննության:

ԿԱՀ-երի դաշտի նկատմամբ վերահսկողության կիրառումը ողջունելի է, սակայն, Հայաստանում պարտադիր փորձաքննության պահանջը չի կարող վերաբերել ամբողջ դաշտին: Ինչպես հայտնի է՝ Հայաստանը տարբեր երկրների հետ ունի լաբորատոր փորձաքննությունների արդյունքների փոխճանաչման միջպետական պայմանագրեր, և մեր կարծիքով, Հայաստան ներմուծելիս արտադրանքի կրկնակի փորձաքննությունը կբերի սպառողների շահերի ոտնահարման, կոռուպցիոն ռիսկերի ավելացման և դաշտի մոնոպոլիզացման: Դա այն դեպքում, երբ կառավարությունն իր գործունեության գերակա ուղղություններից է հայտարարել գործարար և ներդրումային միջավայրի բարելավումը, ծառայությունների և վարչարարական ընթացակարգերի պարզ, թափանցիկ և քիչ ծախսատար միջավայրի ստեղծումը, հավասար մրցակցային պայմանների ապահովումը:

Օրինակ՝ արդեն շուրջ 7 տարի է «Արմենիավիժն» ընկերությունը զբաղվում է կենսաբանական ակտիվ հավելումների (ԿԱՀ-երի) ներմուծմամբ և վաճառքով: Ամբողջ ապրանքատեսականին արտադրվում է GMP (Goog Manufacturing Practice - Արտադրության պատշաճ պայմաններ) արտադրանքի որակի բարձր չափանիշներին համապատասխանող արտադրությունում, ինչպես նաև ունի ISO22000 միջազգային սերտիֆիկացման ստանդարտ, որով սահմանվում են սննդամթերքի անվտանգության կառավարման համակարգերի պահանջները։

Արտադրության և որակի նման ստանդարտներն արդեն իսկ թույլ են տալիս սպառողին զերծ մնալ անորակ, վտանգավոր և անօրինական արտադրանքից և գոնե այժմ դժվար է պատկերացնել, որ Հայաստանում նման փորձաքննության հնարավորություն լինի:

Նշեմ նաև, որ դեռևս 2005թ. մեր ընկերության կողմից ներմուծված ամբողջ արտադրանքը հավաստագրվել է ՀՀ ԱՆ դեղերի և բժշկական տեխնոլոգիաների կենտրոնում, այն դեպքում, երբ ԿԱՀ-երի հավաստագրումը չէր կանոնակարգվում օրենքով»:

Հ.Գ.
Հաշվի առնելով թեմայի հրատապությունը՝ խմբագրությունը պատրաստակամ է ներկայացնել խնդրով շահագրգիռ այլ կողմերի տեսակետները ևս: