Փաստ ինֆո

Թերթը գրում է. «Կառավարության դեկտեմբերի 6-ի նիստում հավանության է արժանացել «ՀայՓոստ» ՓԲԸ-ի հետ համագործակցության պայմանագիր կնքելու` պետական եկամուտների կոմիտեի առաջարկը: Դա նշանակում է, որ համատեղ նախաձեռնությամբ «ՀայՓոստի» վերանորոգված և արդիականացված բոլոր բաժանմունքներում կստեղծվեն սպասարկման կետեր, որտեղ աշխատելու են ՊԵԿ ներկայացուցիչներ:

Դեռևս 2008-ից ներդրված էլեկտրոնային կառավարման համակարգի և ծառայությունների կատարելագործման, բարեփոխումների շարունակականության ապահովման շնորհիվ, ըստ ՊԵԿ տեղեկատվական տեխնոլոգիաների վարչության պետ Միքայել Փաշայանի, այսօր հնարավորություն է ստեղծվում Հայաստանի ամբողջ տարածքով մեկ, անտեսելով աշխարհագրական դիրքը, ավելի քան 200 կետերում առցանց ռեժիմով ունենալ հարկային և մաքսային ոլորտները սպասարկող միանման ծառայություններ. «Կարող եմ փաստել, որ նորամուծության արդյունքում, օրինակ, Մեղրիի հարկ վճարողներին մատուցվող ծառայությունների որակը որևէ կերպ չի տարբերվելու Երևանի հարկատուների սպասարկման որակից»,-ասել է Մ. Փաշայանը:

ՊԵԿ ներկայացուցիչների հիմնական գործառույթներն են լինելու էլեկտրոնային եղանակով հաշվետվությունների ներկայացման, հարկերի, տուրքերի և այլ վճարումների հետ կապված հարցերին օժանդակումը, ինչպես նաև հարկային և մաքսային վարչարարության, օրենսդրության հետ կապված հարցերի պարզաբանումը: Իսկ «ՀայՓոստի» բաժանմունքներում տեղադրվող տերմինալների միջոցով ՊԵԿ ներկայացուցիչների աջակցությամբ հարկ վճարողները կկարողանան նաև հարկային հաշվարկներ ու հաշվետվություններ ներկայացնել»: