Փաստ ինֆո

Հատուկ քննչական ծառայությունում ավարտվել է «Գապբնակշին», «Նարեկ-Դավիթ» և «Նարեկ-Գրադ» ՍՊ ընկերությունների տնօրեն Գագիկ Պապոյանի և Սիմոն Աղազարյանի կողմից առանձնապես խոշոր չափերով խարդախություն կատարելու դեպքի առթիվ հարուցված քրեական գործի նախաքննությունը:

Ձեռք բերված փաստական տվյալների համաձայն՝ նրանց մեղադրանք է առաջադրվել ՀՀ քրեական օրենսգրքի 178-րդ հոդվածով՝ առանձնապես խոշոր չափերով խարդախություն: Քրեական գործով անցնում են ավելի քան 200 տուժողներ, որոնք հավատալով կառուցապատողին՝ այսօր մնացել են առանց բնակարանի և առանց դրամական միջոցների: Եվ սա այն դեպքում, երբ նրանցից շատերը Երևանի Արամի 72-80 հասցեներում կառուցվող էլիտար բնակարանների արժեքը հասցրել են ամբողջությամբ վճարել: Պապոյանը մեղադրվում է խարդախության եղանակով 407,4 մլն. դրամ գումար հափշտակելու մեջ: Նա կալանավորվել է այս տարվա մարտին: Իսկ Ս. Աղազարյանն այլ գործի շրջանակներում արդեն կրում է իր պատիժը:

Չկայացած գնորդները փոխհատուցման հետ կապված անհանգստացած են: Նշենք, որ ինչպես մեղադրյալների, այնպես էլ հիշյալ ընկերությունների հաշվեհամարներին կալանք է դրված: Նշենք, որ ՀՀ վարչապետի որոշմամբ ստեղծվել է կառավարական հանձնաժողով, որը պետք է զբաղվի փոխհատուցման հարցերով: Թե ինչպես պետք այն իրականացվի, առայժմ հայտնի չէ:

Քրեական գործի նկատմամբ դատախազական հսկողություն իրականացնող դատախազը հաստատել է մեղադրական եզրակացությունը և դեկտեմբերի 7-ին քրեական գործը մեղադրական եզրակացությամբ ուղարկվել է Երևան քաղաքի կենտրոն և Նորք- Մարաշ վարչական շրջանների ընդհանուր իրավասության առաջին ատյանի դատարան: