Փաստ ինֆո

Թերթը գրում է. «Դեռևս 2011թ. հունիսին «Ժողովուրդ»-ը գրել էր, որ ՀՀ ոստիկանությունում դրված է Արաբկիրի ոստիկանապետ Արթուր Մեհրաբյանի պաշտոնանկության հարցը: Նշել էինք, որ Ա. Մեհրաբյանը հնարավոր է, որ պատիժ կրի հարազատ քեռորդու` Ստեփան Սիմոնյանի պատճառով, որը ձերբակալվել էր հուլիսի 14-ի գիշերը:

Ի դեպ սա Ա. Մեհրաբյանի միակ խայտառակությունը չէ: Երբ նա Կենտրոնի ոստիկանապետն էր, հրաժեշտ տվեց այդ պաշտոնին, քանի որ ոստիկանության քրեական հետախուզության գլխավոր վարչության նախկին պետ Հովհաննես Թամամյանը բացահայտեց Մեհրաբյանի և դատական դեպարտամենտի պետ Միսակ Մարտիրոսյանի խորհրդական Ալեքսանդր Անդրեասյանի արած ծածկադմփոցները»:

Թերթը հիշեցնում է, որ Կենտրոնի նախկին դատախազ Անդրեասյանի որդին կռիվ էր արել, իսկ ոստիկանապետ Մեհրաբյանը թաքցրել էր հանցանքը:

«Ժողովուրդ»-ի թղթակիցը զրուցել է Երևանի ոստիկանապետ Ներսես Նազարյանի հետ` պարզելու համար, թե այս անգամ կոնկրետ ինչի համար է Ա. Մեհրաբյանը պաշտոնանկ արվել:

Թղթակցի այն հարցին, թե նշվում է շուրջ 90 հանցագործություն թաքցնելու հանգամանքը և արդյոք դա է պաշտոնանկության պատճառը, Ն. Նազարյանը պատասխանել է. «Եթե նման բան ասում են, Դուք էլ հավատում եք... Կան ընդամենը մի քանի դեպքեր հայտնաբերված, ես այժմ չեմ կարող անհատական ասել, հազար դեպք է լինում: Բայց տենց 90-100 հատ, տենց որոշումներ... չկա: Սա աշխատանքային առօրյա է, պետք չէ այդպես նայել ամեն ինչին»:

Ըստ թերթի մեկնաբանության` կադրերի տրամադրության տակ գտնվող Արթուր Մեհրաբյանի «գործն» այժմ հատուկ քննչական ծառայությունում է, ու դատելով նախկինում նրա նկատմամբ ցուցաբերված «դատախազական» վարքագծից` կարելի է կանխատեսել, որ այս անգամ ևս «կպլստա»: Անհասկանալի հանգամանքներում Մեհրաբյանը մշտապես հովանավորներ է գտնում և՛ ոստիկանությունում, և՛ դատախազությունում: