Փաստ ինֆո

Թերթը գրում է, որ իրենց է դիմել Արարատի մարզի Նորաբաց գյուղի Նոր թաղամասի թիվ 1 բնակելի տան բնակչուհի Մ. Դանիելյանը` խնդրանքով, որ տարիներ շարունակ դատական ատյաններում վիճարկվող իր խնդրի մասին ահազանգեն համապատասխան մարմիններին, քանի որ, ըստ նրա, դատարանների կողմից արձակված որոշումների հիմքում մի շարք կեղծիքներ են տեղ գտել:

Թերթը նշում է, որ այս տարեց կինը երկու անգամ ինքնահրկիզման փորձ է կատարել, որոնցից մեկը կանխվել է ԱԱԾ աշխատակիցների կողմից, իսկ մյուս դեպքում՝ միջամտել են լրագրողները:

Մ. Դանիելյանը 1993թ. նույն գյուղի բնակիչ Ա. Մինասյանից գնել է տնամերձ հողամաս: Սակայն քանի որ Մ. Դանիելյանն անձնագիր չի ունեցել, առուվաճառքի գործարքը ձևակերպել են նրա դստեր անվամբ` հետագայում մոր անվամբ անվանափոխելու պայմանով:

Սակայն հետագայում աղջիկը հրաժարվել է մոր սեփականությունը կամովին վերադարձնել: 2010թ. Մ. Դանիելյանը հայց է ներկայացրել դատարան` ընդդեմ Ա. Ասրիյանի` անշարժ գույքի նկատմամբ ձեռքբերման վաղեմությամբ սեփականության իրավունքը ճանաչելու պահանջի մասին, ինչը դատարանը բավարարել է և ինչի հիման վրա կատարվել է պետական գրանցում:

«Բանից պարզվեց, որ աղջկաս ներկայացուցիչ Գ. Գևորգյանը վերաքննիչ դատարան բողոք է ներկայացրել վճռի` օրինական ուժի մեջ մտնելուց վեց ամիս հետո, և վերաքննիչ դատարանի դատավոր Ա. Պետրոսյանը բողոքը վարույթ է ընդունել: Այդ ժամանակահատվածն օգտագործելով` աղջկաս ներկայացուցիչը վճիռը նոր երևան եկած հանգամանքներով բողոքարկելու հիմքեր ստեղծելու նպատակով դիմել է ՀՀ գլխավոր դատախազին և ՀՀ ոստիկանությանը` պահանջելով իմ դեմ քրեական գործ հարուցել` իբր ես խարդախությամբ փորձել եմ տիրանալ նրա սեփականությունը հանդիսացող անշարժ գույքին:

Մի դժբախտություն ունեմ. աղջիկս, որը, համենայն դեպս, հոգեպես խանգարվածի արարքներ է կատարում, ու ես չգիտեմ` ինչպես պաշտպանել իրեն և ինչպես պաշտպանեմ ինձ»:

Այնուամենայնիվ ոստիկանության Մասիսի բաժնում նախապատրաստված նյութերով 2010թ. մարտի 18-ի որոշմամբ քրեական գործի հարուցումը մերժվել է: 2012թ. Արարատի մարզի դատախազի տեղակալ Ա. Հակոբյանը որոշում է կայացրել` Ա. Ասրիյանի կողմից սուտ մատնություն կատարելու և Մ. Դանիելյանին ծանր հանցագործության մեջ մեղադրելու դեպքի առթիվ քրեական գործ հարուցելու մասին:

Սակայն Մ. Դանիելյանը 2012թ. սեպտեմբերին պատահաբար հայտնաբերել է, որ կրկին կատարվել է սեփականության իրավունքի պետական գրանցում Ա. Ասրիյանի անավամբ, այն դեպքում, երբ քրեական գործի հարուցման ընթացքում անշարժ գույքը եղել է արգելանքի տակ:

«Հույս ունեմ, որ հանրապետության Նախագահը, ՀՀ վարչապետը, գլխավոր դատախազն ու արդարադատության նախարարը կարձագանքեն»,- նշել է քաղաքացի Մ. Դանիելյանը: