Փաստ ինֆո

Ինքնաշեն ատրճանակ՝ ապօրինի զենք-զինամթերք պահելու և կրելու կասկածանքով բերման ենթարկվածի գոտկատեղից

Դեկտեմբերի 6-ին, ժամը 17.30-ի սահմաններում, ոստիկանության կազմակերպված հանցավորության դեմ պայքարի գլխավոր վարչության ծառայողները, ստացված օպերատիվ տեղեկությունները իրականացնելու արդյունքում, ապօրինի զենք-զինամթերք պահելու և կրելու կասկածանքով, Նոր Նորքի 2-րդ զանգվածի Դավիթ Մալյան փողոցի թիվ 2 շենքի բակից բերման են ենթարկել 1995 թ. ծնված Սուրեն Պողոսյանին:
Անձնական խուզարկությամբ նրա գոտկատեղից հայտնաբերվել է ինքնաշեն ատրճանակի նմանվող սարք, որում տեղադրված էր ատրճանակին հարմարեցված 1 փամփուշտ, իսկ տաբատի աջ և ձախ գրպաններից՝ նույնատիպ մեկական փամփուշտ:
Ըստ Ս. Պողոսյանի հայտարարության` ատրճանակին նմանվող սարքը պատրաստել է տնային պայմաններում, իսկ փամփուշտները գնել է «Դինամո» մարզահամալիրին կից շուկայից:
Հայտնաբերվածն ուղարկվել է փորձաքննության:
Հանգամանքները պարզվում են: Կատարվում է հետաքննություն:

Կողոպտիչները հայտնաբերվել և ձերբակալվել են

Նոյեմբերի 7-ին ոստիկանության Նոր Նորքի բաժնում հաղորդում էր ստացվել, որ հափշտակել են 38-ամյա մի կնոջ պայուսակը, որի մեջ եղել էր կանխիկ գումար, «Նեթ-բուք» համակարգիչ և բջջային հեռախոս:
Ոստիկանության ծառայողները ստացված օպերատիվ տեղեկություններն իրականացնելիս, կողոպուտ կատարելու կասկածանքով, բերման են ենթարկել 1987 թ. ծնված Մելսիկ Պողոսյանին, 1980 թ. ծնված Գևորգ Մինասյանին, 1988 թ. ծնված Արմեն Գագիկյանին և 1987 թ. ծնված Գևորգ Բաբայանին:
Նրանք խոստովանել են, որ նշված կողոպուտը կատարել են իրենք:
Հափշտակվածը մասամբ առգրավված է: Մ.Պողոսյանը, Գ. Մինասյանը, Ա. Գագիկյանը և Գ. Բաբյանը ձերբակալված են:

***
Ձեռնարկված հետագա միջոցառումների շնորհիվ պարզվել է, որ հանցավոր եռյակը դեկտեմբերի 5-ի գիշերը Արաբկիրի վարչական տարածքում, «Մերսեդես C-240» և «Հունդայի Վերնա» մակնիշի ավտոմեքենաներից, գողացել է 4-ական անիվները: Կատարվում է նախաքննություն:

Տաքսու վարորդը տիրացել էր ուղևորների գումարին և իրերին

Օրերս ոստիկանության Կենտրոնականի բաժնում մի քաղաքացուց հաղորդում է ստացվել, որ օգոստոսի 1-ին Օպերայի և բալետի ազգային ակադեմիական թատրոնի տարածքում կորցրել է բջջային հեռախոսը:
Ոստիկանության ծառայողների ձեռնարկած միջոցառումների շնորհիվ պարզվել է, որ օգոստոսի 1-ին, ժամը 20.30-ի սահմաններում, քաղաքացին իր բջջային հեռախոսն ու կնոջ մոր պայուսակը, որի մեջ եղել է ոսկյա ժամացույց, ոսկյա 2 մատանի, 63.000 դրամ, 50 եվրո, ռուսական մետաղադրամներ, բանալի, անձնագիր և շպարման պարագաներ, մոռացել և թողել է «ՎԱԶ-2107» մակնիշի տաքսի ավտոմեքենայի սրահում:
Ոստիկանները պարզել են նաև, որ տաքսու վարորդը՝ 1951 թ. ծնված Գառնիկ Է.-ն, հեռանալով նշված վայրից` ապօրինի կերպով տիրացել է նշված գումարին և իրերին:
Ձեռնարկված միջոցառումների շնորհիվ դեկտեմբերի 7-ին, ժամը 00.50-ին, տաքսու վարորդը ներկայացել է բաժին, խոստովանել իր կողմից կատարած արարքն ու Նուբարաշենի խճուղում գտնվող ռեստորանի ցանկապատի միջից ներկայացրել իր կողմից պահված գողոնը: Կատարվում է հետաքննություն: