Փաստ ինֆո

Ազգային ժողովի Էթիկայի հարցերով ժամանակավոր հանձնաժողովը երկու ժամ տևած քննարկումների արդյունքում որոշեց քննության վերցնել ՀՅԴ խմբակցության ղեկավար Արմեն Ռուստամյանի դիմումը: Ինչպես նիստից հետո «Pastinfo.am»-ի թղթակցին հայտնեց հանձնաժողովի նախագահ, «Հայ ազգային կոնգրես» խմբակցության ներկայացուցիչ Նիկոլ Փաշինյանը, դիմումի հարցով հանձնաժողովում ներկայացուցիչ է նշանակվել «Ժառանգություն» խմբակցության անդամ Զարուհի Փոստանջյանը: Նա երեսնօրյա ժամկետում Էթիկայի հանձնաժողովի քննարկմանն ու հաստատմանը պետք է ներկայացնի հիշյալ հարցի վերաբերյալ որոշման նախագիծ: Անհրաժեշտության դեպքում այդ ժամկետը կարող է երկարաձգվել ևս 20 օրով:

Նշենք, որ նիստում հարցի քննարկմանը և քվեարկությանը մասնակցում էին 4 խմբակցությունների՝ «Բարգավաճ Հայաստան»-ի, ՀՅԴ-ի, ՀԱԿ-ի և «Ժառանգության» ներկայացուցիչները: ՀՀԿ-ի ներկայացուցիչ, Էթիկայի հանձնաժողովի փոխնախագահ Դավիթ Հարությունյանը և հանձնաժողովում «Օրինաց երկիր» խմբակցության ներկայացուցիչ Հովհաննես Մարգարյանը, ԱԺ կանոնակարգ-օրենքի համաձայն, չմասնակցեցին, քանի որ Ա. Ռուստամյանի դիմումին կցված ցանկում ի թիվս ԱԺ արտահերթ նիստից բացակայած 83 պատգամավորների անունների, նշված էին նաև վերոհիշյալ երկու պատգամավորների անունները:

Ինչպես «Pastinfo.am»-ն ավելի վաղ տեղեկացրել էր, Ազգային ժողովի ՀՅԴ խմբակցությունը նոյեմբերի 28-ին դիմել է Էթիկայի հարցերով ժամանակավոր հանձնաժողովին` նոյեմբերի 21-ին հրավիրված ԱԺ-ի արտահերթ նիստին չգրանցված պատգամավորների կողմից ԱԺ կանոնակարգ-օրենքի 6.1-րդ հոդվածի 2-րդ մասի ա), գ), զ) կետերով նախատեսված էթիկայի կանոնները խախտելու վերաբերյալ հարցը քննելու և համապատասխան որոշում կայացնելու խնդրանքով: Դիմումին կից ներկայացվել է այդ պատգամավորների ցանկը:

Էթիկայի հարցերով ժամանակավոր հանձնաժողովին ուղղված դիմումում ՀՅԴ խմբակցության ղեկավարն ընդգծել է, որ էթիկայի կանոնների խախտումն արտահայտվել է վերոհիշյալ արտահերթ նիստին չմասնակցելով: Ըստ դիմումատուի, ավելին` այդ պատգամավորներից յուրաքանչյուրը խոչընդոտել է նաև Սահմանադրությամբ նախատեսված` ԱԺ-ի գործառույթների իրականացմանը և փաստացի նպաստել Սահմանադրության 70-րդ հոդվածով նախատեսված արտահերթ նիստի գումարման, բնականոն գործունեության ձախողմանը:

Հիշեցնենք, որ Ազգային ժողովի 48 պատգամավորների նախաձեռնությամբ նոյեմբերի 21-ին հրավիրված խորհրդարանի արտահերթ նիստում նախատեսվում էր քննարկել ՀՀ ընտրական և քրեական օրենսգրքերում, «Բնակչության պետական ռեգիստրի մասին» օրենքում փոփոխություններ և լրացումներ կատարելու մասին «Հայ ազգային կոնգրես» խմբակցության անդամների հեղինակած օրենքների նախագծերի փաթեթը: Սակայն նիստը չկայացավ, քանի որ ԱԺ կանոնակարգ-օրենքով սահմանված երեք ժամում քվորումն այդպես էլ չապահովվեց. գրանցվել էր ընդամենը 46 պատգամավոր, մինչդեռ նիստի աշխատանքը սկսվելու համար անհրաժեշտ էր, որպեսզի գրանցվեր առնվազն 66 պատգամավոր: