Փաստ ինֆո

ՌԴ արտգործնախարար Սերգեյ Լավրովն այսօր վերադառնալով Դուբլինից, հայտարարել է, որ «Մագնիտսկու օրենքին» ի պատասխան Ռուսաստանը կփակի մուտքը այն ամերիկացիների առջև, ովքեր իրոք մեղավոր են մարդու իրավունքների խախտման համար:

«Քլինթոնի հետ հանդիպման ժամանակ ես հաստատեցի, որ մենք նույնպես կփակենք ամերիկացիների մուտքը, որոնք իրոք մեղավոր են մարդու իրավունքների խախտման համար»,- ընդգծել է նախարարը:

ԱՄՆ կոնգրեսն հինգշաբթի ընդունել է օրենք Ռուսաստանի հետ առևտրային հարաբերությունները կարգավորելու մասին, որի մեջ ներառված է նաև այսպես կոչված «Մագնիտսկու ակտը»:

Դրան կողմ են քվեարկել 92 սենատոր, դեմ՝ 4-ը:

«Ռուսաստանի և Մոլդովա -2012 Ջեկսոն-Վենիկի ուղղումը չեղյալ հայտարարելու օրենքը» երկու կողմերին տալիս է ԱՄՆ-ի նորմալ առևտրային գործընկերը լինել: Ավելի շուտ այդ փաստաթուղթը ընդունվել է ներկայացուցիչների պալատի կողմից: Այժմ այն ստորագրելու համար ուղարկվել է նախագահ Օբամային»,-հաղորդում է ԻՏԱՐ-ՏԱՍՍ-ը:

1974թ.-ին ընդունված Ջեկսոն-Վենիկի ուղղումը առևտրի հարցերը կապում էր ԽՍՀՄ-ից ազատ էմիգրացվելու խնդրի հետ: ԱՄՆ-ի գործարար շրջանները արդեն ողջունել են Ռուսաստանին նորմալ առևտրային գործընկերոջ կարգավիճակ տալու Կոնգրեսի որոշումը, քանի որ, հակառակ պարագայում ամերիկյան բիզնեսը առավելություններ չէր ունենա Առևտրի համաշխարհային կազմակերպությանը Մոսկվայի անդամակցությունից:

Սակայն այս օրենքը պարունակում է Մոսկվայի համար ոչ հաճելի բեռ՝ «Մագնիտսկու ակտը», որը վերաբերում է մարդու իրավունքներին և Ռուսաստանի կոռուպցիայի հիմնախնդիրներին: Այդ ակտը մասնավորապես նախատեսում է պատժամիջոցներ ռուսական ուժային մարմինների և դատավորների համար, ովքեր առնչվում են «Էրմիտաժ քեփիտալ մենեջմենթ» հիմնադրամի իրավաբան Մագնիտսկու մոսկովյան քննչական մեկուսարանում 2009թ. նոյեմբերին զոհվելու հետ:

«Մագնիտսկու ակտի» դրույթներից մեկը պարտավորեցնում է՝ ԱՄՆ-ի նախագահին ոչ ուշ քան օրենքն ուժի մեջ մտնելուց 120 օր հետո, Կոնգրեսի համապատասխան կոմիտեներ ուղարկել այն քաղաքացիների ցուցակը, ովքեր առնչվում են Սերգեյ Մագնիտսկու մահվան հետ, ինչպես նաև այն անձանց անունները, ովքեր «պատասխանատվություն են կրում դատականից դուրս սպանությունների, խոշտանգումների և մարդու իրավունքների այլ լուրջ խախտումների համար»:

Ավելացնենք, որ Մոսկվան մեկ անգամ չէ, որ նշել է, որ «Մագնիտսկու ակտի» ընդունումը կարող է բացասական անդրադարձ ունենալ երկկողմանի հարաբերությունների վրա՝ առաջացնելով սիմետրիկ և ասիմետրիկ ռեակցիա Ռուսաստանի կողմից: