Փաստ ինֆո

Կաշառք ստանալու մեջ մեղադրվող ԱԱԾ քննչական վարչության քննիչ Վլադիմիր Կոթոլյանը դեկտեմբերի 13-ին հանդես կգա վերջին խոսքով, և Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Մխիթար Պապոյանի նախագահությամբ, կհեռանա խորհրդակցական սենյակ՝   դատական ակտ կայացնելու:

Այսօրվա դատական նիստում Վ. Կոթոլյանի երեք պաշտպանները՝ Վաղարշակ Գևորգյանը, Կարեն Քամալյանը և Էմիլ Պետրոսյանը ավարտեցին միացյալ պաշտպանական ճառի հրապարակումը: Նրանք միջնորդեցին կարճել իրենց պաշտպանյալի դեմ հարուցված քրեական գործը՝ հանցակազմի բացակայության հիմքով:  

Ըստ պաշտպանական կողմի, մեղադրանքը շինծու է՝ հիմնված սոսկ ենթադրությունների ու կասկածների վրա, գործը «բանսարկության և զրպարտության փորձ է» և նպատակ ունի վարկաբեկելով ամբաստանյալին՝ «մեղադրել մի արարքի մեջ, որը տեղի չի ունեցել»: Իսկ մեղադրանքը հիմնված է «թմրանյութերի ներկրմամբ զբաղվող, պրոֆեսիոնալ թմրամոլ», համապատասխան մարմիններից կախման մեջ գտնվող և նրանց կամքը կատարող Հովհաննես Գևորգյանի  զրպարտչական ցուցմունքների վրա առ այն, որ քրեական պատասխանատվությունից խուսափելու համար քննիչի պահանջով տվել է նրան 4000  դոլար կաշառք:

Վկա Գևորգյանի ցուցմունքներն անարժանահավատ է նաև այն պատճառով, որ քացախաթթվի անհիդրիդ ներկրելու համար նախատեսվում է տուգանք, ուստի անհեթեթ ու մերկապարանոց է այն պնդումը, թե քրեական պատասխանատվութունից ազատվելու համար քննիչին «վճարվել է»  4000 դոլար, առավել ևս, որ վկան այդ փողերը չուներ և գտնվում էր ֆինանսական ծանր վիճակում:  (Ըստ մեղադրանքի, քննիչն իր վարույթում գտնվող՝  «Զվարթնոց» օդանավակայան ժամանած Մ. Ավետիսյանի և Հ. Գևորգյանի մոտից  0.5 մգ քացախաթթվի անհիդրիդի հայտնաբերման գործով,  հիշյալ անձանցից ստացել է 2000-ական ԱՄՆ դոլար):

Պաշտպանական կողմը հիշեցրեց, որ  դատավճիռն  արդեն մեկ անգամ բեկանվել է, ուղարկվել առաջին ատյանի դատարան՝ նոր կազմով նորից քննելու, սակայն մեղադրող Աշոտ Նադոյանն իր մեղադրական ճառում հաշվի չի առել նոր դատաքննությամբ ձեռք բերված ապացույցները, որոնք, ըստ պաշտպանական կողմի, ապացուցում են ամբաստանյալի անմեղությունը: Ավելին՝ մեղադրական ճառը 2010թ հաստատված մեղադրական եզրակացության կրկնությունն էր:

Մեղադրողը հանդես եկավ ռեպլիկով և հայտարարեց, որ Վ.Կոթոլյանի դեմ մեղադրանքին ճիշտ քրեաիրավական գնահատական է տրվել,  որ ինքը պնդում է մեղադրական ճառում տեղ գտած իր հիմնավորումներն ու միջնորդությունը:

Հիշեցնենք, որ գործով առաջին դատավճռով  Վ. Կոթոլյանը դատապարտվել էր  7 տարվա ազատազրկման, դատավճիռը բեկանվել էր և ուղարկվել դատարան՝ նոր քննության: Մեղադրող Աշոտ Նադոյանը իր մեղադրական ճառում նորից միջնորդել էր ամբաստանյալին դատապարտել 7 տարվա ազատազրկման և բռնագանձել անձնական գույքի 1/3-րդը: