Փաստ ինֆո

Դեկտեմբերի 6-ին ավարտվեց Ազգային ժողովի աշնանային նստաշրջանը: Նույն օրը քննարկված` տնտեսական և հարկային ոլորտները կարգավորող մի շարք օրինագծերի քվեարկությունները, ըստ ամենայնի, տեղի կունենան ԱԺ-ի դեկտեմբերի 17-ին կայանալիք արտահերթ նստաշրջանում:

Կառավարությունն այսօր Ազգային ժողովի նախագահին առաջարկել է դեկտեմբերի 17-ին գումարել ԱԺ արտահերթ նստաշրջան` օրակարգում ընդգրկելով առաջնահերթ քննարկում պահանջող մոտ երկու տասնյակ հարց։

ԱԺ այսօրվա քննարկումների ընթացքում որոշ պատգամավորների բավականին շահագրգիռ պահվածքը, թերևս, պատճառ հանդիսացավ, որպեսզի ԱԺ էթիկայի հարցերով ժամանակավոր հանձնաժողովի նախագահ, «Հայ ազգային կոնգրես» խմբակցության անդամ Նիկոլ Փաշինյանը հանդես գա հիշեցմամբ առ այն, որ ԱԺ կանոնակարգ-օրենքում այս տարվա գարնանը կատարված փոփոխությունների և լրացումների արդյունքում գործում են ԱԺ պատգամավորի էթիկայի կանոնները. «Սահմանված է, որ որոշակի դեպքերում ԱԺ պատգամավորները պարտավոր են հանդես գալ շահերի բախման վերաբերյալ հայտարարությամբ: Ես կոչ եմ անում պատգամավորներին, որ ուսումնասիրեն կանոնակարգի 6.2 և 6-րդ հոդվածները: Քանի որ նոր ներդրված կանոններ են, կարծում եմ, լավ կլինի, որ բոլոր պատգամավորներն այդ կանոններին տիրապետեն»:

Նշենք, որ ԱԺ կանոնակարգ-օրենքի 6-րդ հոդվածով ամրագրվում են պատգամավորի պարտականությունները: Ըստ կատարված լրացումների, մասնավորապես, պատգամավորը պարտավոր է պահպանել պատգամավորի էթիկայի կանոնները, օրենքի 6.2-րդ հոդվածի 3-րդ կետով նախատեսված դեպքում հանդես գալ շահերի բախման վերաբերյալ հայտարարությամբ:

Հոդված 6.2-ով ամրագրվում է, թե ինչ է պատգամավորի շահերի բախումը: Մասնավորապես, «պատգամավորի կողմից իր կամ իրեն փոխկապակցված անձի անձնական շահերով առաջնորդվելը նշանակում է օրենսդրական նախաձեռնությամբ հանդես գալը կամ Ազգային ժողովի քննարկմանը որոշման նախագիծ ներկայացնելը, Ազգային ժողովում շրջանառության մեջ դրված հարցի վերաբերյալ առաջարկություն ներկայացնելը, ինչպես նաև Ազգային ժողովի, նրա հանձնաժողովների, ենթահանձնաժողովների նիստերում ելույթ ունենալը կամ քվեարկությանը մասնակցելը, որը թեև ինքնին օրինական է, սակայն պատգամավորը տեղյակ է, որ այն հանգեցնում կամ նպաստում է կամ ողջամտորեն կարող է հանգեցնել կամ նպաստել նաև`

ա) իր կամ իր հետ փոխկապակցված անձի գույքային կամ իրավական դրության բարելավմանը.

բ) իր կամ իր հետ փոխկապակցված անձի անդամակցած ոչ առևտրային կազմակերպության գույքային կամ իրավական դրության բարելավմանը.

գ) իր կամ իր հետ փոխկապակցված անձի մասնակցությամբ առևտրային կազմակերպության գույքային կամ իրավական դրության բարելավմանը.

դ) իր հետ փոխկապակցված անձին պաշտոնում նշանակմանը»:

6.2-րդ հոդվածի հիշատակվող 3-րդ կետով սահմանվում է. «Ազգային ժողովի, նրա հանձնաժողովների, ենթահանձնաժողովների նիստերում շահերի բախում առաջանալու  դեպքում պատգամավորը պարտավոր է համապատասխան նիստում իր ելույթից կամ քվեարկությունից առաջ հանդես գալ շահերի բախման վերաբերյալ հայտարարությամբ, իսկ օրենսդրական նախաձեռնությամբ  հանդես գալիս, Ազգային ժողովի քննարկմանը որոշման նախագիծ ներկայացնելիս կամ Ազգային ժողովում շրջանառության մեջ դրված հարցի վերաբերյալ առաջարկություն ներկայացնելիս՝ համապատասխան փաստաթղթերի հետ ներկայացնել  շահերի բախման վերաբերյալ իր գրավոր հայտարարությունը` ներկայացնելով շահերի բնույթը»:

Նշվում է նաև, որ ԱԺ-ի նիստում շահերի բախման վերաբերյալ հայտարարությամբ հանդես գալու դեպքում պատգամավորը կարող է նաև հայտարարել, որ հրաժարվում է մասնակցել հարցի քվեարկությանը, որից նրա բացակայությունը ԱԺ կանոնակարգ-օրենքով նախատեսված հիմքով համարվում է հարգելի: