Փաստ ինֆո

Գաղտնիք չէ, որ Ռուսաստանի հետ առնչվող հայ գործարարները, բեռնափոխադրումներ իրականացնող վարորդները մերթընդմերթ հանդիպում են ապրանքների փոխադրման հետ կապված դժվարությունների` պայմանավորված, այսպես ասած, երկակի ստանդարտների կիրառմամբ: Կարճ ասած, նույն ապրանքը մի դեպքում կարելի է տեղափոխել, մյուս դեպքում չի կարելի… Այդպիսի դեպքերից ընդամենը մեկի մասին, իբրև օրինակ, մեր կայքի ընթերցողներին տեղեկացրել ենք:

Մասնավորապես` 2011թ. դեկտեմբերին Հայաստանից Ռուսաստան խաղող արտահանող 15 ավտոմեքենա ունենալով բոլոր անհրաժեշտ ուղեկցող փաստաթղթերը, հատել էին Վերին Լարսի սահմանային անցակետը: Նշված բեռնատարներից 8-ը ուղեվորվել էր Մոսկվա, իսկ 7-ը` Ռյազան: Սակայն Ռյազան տեղափոխված բեռն ամբողջությամբ վերադարձվել էր, քանի որ ‹‹Ռոսսելխոզնադզորը›› ապրանքի մեջ բացահայտել է վնասակար հարուցիչ (պավելիկա), տրվել էր համապատասխան եզրակացություն, մինչդեռ Մոսկվա ուղարկված նույն խաղողը ստուգումն անցել էր առանց վերապահումների:

Կարծում ենք, ինքնին հասկանալի է, որ բեռնափոխադրողների և, ընդհանրապես, գործարարների համար ամենավատը կամ հյուծիչը անորոշությունն է: Ռուսաստանի Դաշնության տարածք ապրանքների ներմուծման, անասնաբուժական և բուսասանիտարական վերահսկողության ոլորտում գործող ռուսական օրենսդրության վերջերս կատարված վերլուծությունը բացահայտել է տարբեր իրավական ակտերում գոյություն ունեցող առանձին դրույթների հակասականությունը և իրարամերժությունը:

Վերը նշվածը հնարավորություն է տալիս անասնաբուժական, հակահամաճարակային և բուսասանիտարական վերահսկողություն իրականացնող ռուսաստանյան կազմակերպության` ‹‹Ռոսսելխոզնադզորի›› պաշտոնատար անձանց ընդունել ՌԴ մաքսային սահմանով ապրանքների ներմուծումը, արտահանումը թույլատրող կամ սահմանափակող ոչ միանշանակ որոշումներ: Թերևս ավելորդ է ասել, որ հիշյալ հնարավորությունն իր մեջ կոռուպցիոն ռիսկ է պարունակում կամ կոռուպցիայի պարարտ հող է:

Արձանագրելով ոլորտին առնչվող իրավական ակտերի հակասականության և իրարամերժության փաստը, ՀՀ վերահսկիչ պալատը և ՌԴ հաշվիչ պալատն իրենց համատեղ հաշվետվության մեջ, որն ուղարկվել է Հայաստանի և Ռուսաստանի կառավարություններին, ՀՀ Ազգային ժողովին և ՌԴ Դաշնային խորհրդին, որքան էլ անհասկանալի է (կամ գուցե հասկանալի), չեն շարադրել նշված հակասականությունը և իրարամերժությունը վերացնելու առաջարկ: Տեսնենք, թե այդ պարագայում իրավիճակի շտկման համար ինչքան ժամանակ կպահանջվի, Հայաստանից Ռուսաստան և հակառակ ուղղությամբ ապրանքներ առաքող տնտեսվարողները և բեռնափոխադրողները մինչև երբ կտուժեն ռուս չինովնիկների ընդունած ոչ միանշանակ որոշումներից: