Փաստ ինֆո

Թերթը անդրադարձել է Քրեակատարողական վարչության նախկին պետ Սամվել Հովհաննիսյանի նկատմամբ հարուցված քրեական գործին` նշելով, որ վերջին ամիսների ընթացքում Հայստանում որոշակի գործընթացներ են տեղի ունենում` կապված Մոսկվայում կատարված մի սպանության, իսկ հետո Երևանում աղմկահարույց քրեական գործ դարձած պատմության հետ: Խոսքը 6 տարի առաջ Մոսկվայում սպանված Ահմադ Հատոյի Շարոյանի և ՀՀ ԱՆ քրեակատարողական վարչության նախկին պետ Սամվել Հովհաննիսյանի դեմ հարուցված քրգործի մասին է, որը կարծես սկսել է տեղից շարժվել` պայմանավորված ինչ-ինչ հանգամանքներով:

Ըստ թերթի վերլուծության. «Միմյանցից հեռու այս երկու դեպքերի միջև կապի մասին տեղեկանում ենք «Առավոտ»-ում տպագրված մի հրապարակումից»: Ըստ այդմ` ՌԴ ՆԳՆ նախարար Ռ. Նուրղալիևը հայաստանյան ԶԼՄ-ների հետ հանդիպման ժամանակ հիշատակել էր 2006թ. Ռուսաստանում շահադիտական նպատակներով կատարված սպանությունների մասին, այդ թվում` Ահմադ Շարոյանի:

Թերթի փոխանցմամբ` թեև ռուս իրավապահները պարզել էին, որ նրա վրա հարձակվողները և սպանողները եղել են 5 հոգի` Ռուստամ, Զադա, Ջամալ, Մրազ, Ամեն Սլոյանները, սակայն մեղավորներին չէին բռնել: «Առավոտ»-ը, հղում անելով աղբյուրներին, այդ հանգամանքը բացատրել էր Սլոյանների ազդեցիկ հորեղբոր` Միրզա Սլոյանի կապերով:

ՀՀ ԱԱԾ-ում ՔԿՎ նախկին պետ Ս. Հովհաննիսյանի դեմ հարուցված քրեական գործից պարզ է դառնում, որ Շարոյանները ցանկացել են վրեժ լուծել Սլոյաններից, բայց Ս. Հովհաննիսյանի միջոցով: Ըստ քրգործի տվյալների, քրեակատարողական վարչության նախկին պետ Սամվել Հովհաննիսյանը ստանձնել է սպանության պատվերն իրականացնելու միջնորդի դերը:

Իսկ օրեր առաջ ԱԱԾ-ն տեղեկացրեց, որ ավարտվել է սույն քրեական գործով անցնող Արկադի Սուքիասյանի կողմից ապօրինի կերպով զենք ձեռք բերելու և պահելու մասով նախաքննությունը: Նրա վերաբերյալ գործն անջատվել է առանձին վարույթ և ուղարկվել դատարան:

Նրա դերակատարությունը մեղադրանքում հստակ չի երևում. չի բացառվում, որ, նա ՔԿՀ-ում մահափորձի հետ կապված կազմակերպչական գործողություններն իրականացնողներից լինի: