Փաստ ինֆո

Ազգային ժողովը դեկտեմբերի 5-ին քննարկեց հակամենաշնորհային քայլերի վերաբերյալ կառավարությանն ուղղված «Հայ ազգային կոնգրես» խմբակցության հարցապնդումը:

Հիմնական զեկուցող` ՀԱԿ խմբակցության ղեկավար Լևոն Զուրաբյանը մտահոգիչ համարեց Տնտեսական մրցակցության պաշտպանության պետական հանձնաժողովին ուղղված իր գրավոր հարցման պատասխանները:

«Պատասխանի մեջ ամենախայտառակ պնդումը սա է՝ կենտրոնացվածության բարձր մակարդակը պայմանավորված է որոշակի օբյեկտիվ գործոններով, ինչպիսիք են ՀՀ փոքր շուկան, փակ սահմանները, աշխարհագրական դիրքը, մրցունակ տնտեսվարող սուբյեկտների սակավությունը: Գործ ունենք, մի իշխանության հետ, որը ցանկանում է լեգիտիմացնել Սահմանադրությանը հակասող այս իրողությունը: Բոլոր այդ հանգամանքները, որ կառավարությունը նշում է իբրև օբյեկտիվ պատճառ մենաշնորհների համար, նույն կառավարության գործունեության արդյունքն է»,-նշեց Լ.Զուրաբյանը` ընդգծելով, որ բոլորի համար ակհայտ է, թե ովքեր են արտոնյալ պայմաններից օգտվող, մենաշնորհային դիրք ունեցող խոշոր գործարարները:

Լ.Զուրաբյանը, օգտվելով ԱԺ կանոնակարգ-օրենքով սահմանված իրավունքից, եզրափակիչ ելույթում առաջարկեց հարցապնդման վերաբերյալ ընդունել «ՀՀ-ում տնտեսական մրցակցության պաշտպանության և հակամենաշնորհային քաղաքականության գործողությունների ծրագիր մշակելու մասին» որոշման նախագիծը: Այն ներառում է ՀՀ կառավարությանն ուղված մի շարք առաջարկություններ:

Նիստին պատգամավորների ոչ բավարար մասնակցության պատճառով նախագծի քվեարկությունը հետաձգվեց. այն կքվեարկվի դեկտեմբերի 6-ին:

Նախագծով, մասնավորապես, առաջարկվում է կառավարությանը մինչև ԱԺ-ի հաջորդ նստաշրջանը մշակել և խորհրդարանի քննարկմանը ներկայացնել տնտեսական գործունեության ազատության ու ազատ տնտեսական մրցակցության ապահովման և ապօրինի մենաշնորհների վերացմանն ուղղված անհետաձգելի միջոցառումների ծրագիր:

Ծրագրում առաջարկվում է ներառել օրենսդրական փոփոխությունների փաթեթ` որոշման նախագծով ամրագրված մի շարք առաջնային համարվող սկզբունքների կիրառմամբ: Մասնավորապես` տնտեսական ցանկացած ոլորտում որևէ ընկերության մասնաբաժինը, բացառությամբ բնական մենաշնորհների, չի կարող գերազանցել շուկայի 33,33 տոկոսը, պետբյուջե մուտքագրել մենաշնորհային հասույթի 10 և ավելի բարձր տոկոսը, հստակ տարանջատել իշխանությունն ու գործարարությունը, պետական գնումների համակարգը հանել Ֆինանսների նախարարության ենթակայությունից, անհետաձգելի ծրագիր համարել պետության վերահսկողությամբ 5-10 մեծածախ գյուղատնտեսական շուկաների ստեղծման ծրագիրը, խստորեն կանոնակարգել սուպերմարկետների գործունեությունը:

Ի պատասխան ընդդիմադիր պատգամավորի պնդումների` Էկոնոմիկայի նախարար Տիգրան Դավթյանը նշեց, որ, բնականաբար, չի կարող համաձայնել «հնչեցված շատ որակումների, հարցադրումների և փաստերի նկարագրության հետ, որովհետև դրանցից շատերը շատ հեռու են իրականությունից»: «Բայց միևնույն ժամանակ կարծում եմ` հազիվ թե գտնվի մի ողջամիտ քաղաքացի, որ ասի, թե մենք խնդիրներ չունենք երկրում մրցակցության բարելավման հետ կապված: Ունե՛նք և ունենք լրջագույն խնդիրներ»,-ասաց նախարարը` հավելելով, որ կառավարությունն ինքն այդ մասին հայտարարում է և կոնկրետ գործողություններ իրականացնում այդ ուղղությամբ:

Նախարարի մատուցմամբ, կան ստեղծված իրավիճակի թե սուբյեկտիվ և թե օբյեկտիվ պատճառներ: «Բայց, իմ կարծիքով, մենք ունենք նաև իրական, օբյեկտիվ, բավականին բարենպաստ, ցավոք սրտի, մի հանգամանք, որը դժվարացնում է խնդրի լուծումը. դա բոլորիս հայտնի և մեր տնտեսության հիմնական ու կարևորագույն խնդիրն է` փոքր շուկայի առկայությունը»,-նշեց Տ.Դավթյանը:

Նախարարը ներկայացրեց կառավարության կողմից ձեռնարկվող քայլերը, նշելով, որ առաջիկայում ԱԺ-ի քննարկմանը կներկայացնի կառավարության հեղինակած նախագծերի փաթեթ և առաջարկեց համատեղ քննարկել Լ.Զուրաբյանի ներկայացրած որոշման նախագծում ամրագրված առաջարկները` դրանք հետագայում կառավարության փաթեթում ներառելու տեսանկյունից: