Փաստ ինֆո

Ազգային ժողովը դեկտեմբերի 5-ին առաջին ընթերցմամբ ընդունեց Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին կառավարության օրենսդրական նախաձեռնությունը:

Վերջինով վարչական պատասխանատվություն է սահմանվում ոչ միայն շներ և կատուներ, այլև քաղաքային համայնքներում բոլոր տեսակի ընտանի կենդանիներ պահելու կանոնները խախտելու համար: Այդ գործերը քննելու լիազորությունը վերապահվում է համայնքների ղեկավարներին։

Օրինագծի համաձայն, քաղաքային համայնքների տարածքում ընտանի կենդանիներ պահելու կանոնները խախտելն առաջացնում է տուգանքի նշանակում` սահմանված նվազագույն աշխատավարձի հնգապատիկից մինչև տասնապատիկի (5 հազարից մինչև 10 հազար դրամի) չափով։ Եթե արարքների հետևանքով վնաu է պատճառվել իրավաբանական կամ ֆիզիկական անձանց գույքին, ինչպես նաև ֆիզիկական անձանց առողջությանը, ապա նախատեսվում է տուգանքի նշանակում` սահմանված նվազագույն աշխատավարձի քսանապատիկից մինչև հիսնապատիկի (20 հազարից մինչև 50 հազար դրամի) չափով։

Մինչև 50 հազար դրամ տուգանք շենքերը և շինությունները ոչ նպատակային օգտագործելու համար

Վարչական պատասխանատվություն է սահմանվում նաև շենքերի, շինությունների նպատակային օգտագործման և պահպանման, ընդհանուր օգտագործման տարածքներում բարեկարգման կանոնները խախտելու, կանաչ գոտիները վնասելու համար:

Օրենսգիրքը լրացվում է շենքերը և շինությունները օրենսդրությամբ սահմանված պահանջների խախտմամբ ոչ նպատակային օգտագործելու վերաբերյալ նոր` 152.2րդ հոդվածով: Այս իրավախախտման համար նախատեսվում է տուգանքի նշանակում` սահմանված նվազագույն աշխատավարձի քսանապատիկից մինչև հիսնապատիկի (20 հազարից մինչև 50 հազար դրամի) չափով։ Համայնքի ղեկավարի կամ օրենքով սահմանված կարգով նշանակված պատասխանատու պաշտոնատար անձի կողմից շենքերը և շինություններն օրենսդրությամբ սահմանված պահանջների խախտմամբ ոչ նպատակային օգտագործելու ուղղությամբ միջոցներ չձեռնարկելն առաջացնում է տուգանքի նշանակում` սահմանված նվազագույն աշխատավարձի հիսնապատիկից մինչև հարյուրապատիկի (50 հազարից մինչև 100 հազար դրամի) չափով։

Զսպաշապիկ կառուցապատողների համար

Մեկ այլ լրացմամբ օրենսգրքում ամրագրվում է նոր` 157.15-րդ հոդվածը, որով պատասխանատվություն է սահմանվում Երևան քաղաքի վարչական սահմաններում կառուցապատողների կողմից շրջակա միջավայրի վրա շինարարական աշխատանքների ազդեցության նվազեցման, շինարարական աշխատանքների իրականացման ընթացքում փողոցների երթևեկության և հետիոտնի անցումների անվտանգության ապահովման, կառուցապատվող օբյեկտներում շինարարական հրապարակների տարանջատման ու սանիտարական վիճակի ապահովման պայմանները չպահպանելու համար:

20000 դրամ էլ՝ ցուցանակի վրա տեղեկություն չլինելու համար

Մի շարք լրացումներ են կատարվել նաև «Առևտրի և ծառայությունների մասին» օրենքի դրույթների հիման վրա: Մասնավորապես, առևտրի օբյեկտներում և առևտրի իրականացման վայրում վաճառողի (մատակարարի) կողմից մատակարարման պայմանագրով ապրանքների առուվաճառք (մեծածախ առևտուր) կատարելու դեպքում այդ մասին ցուցանակի վրա համապատասխան տեղեկատվություն զետեղված չլինելն առաջացնում է տուգանքի նշանակում՝ սահմանված նվազագույն աշխատավարձի տասնապատիկից մինչև քսանապատիկի չափով։

Բացօթյա առևտուր իրականացնող վաճառողի կողմից վաճառքի թույլատրված ապրանքների համար օրենսդրությանը համապատասխան՝ պահման և վաճառքի պայմաններն ապահովող սարքավորումներով չապահովելն առաջացնում է տուգանքի նշանակում՝ սահմանված նվազագույն աշխատավարձի տասնհինգապատիկից մինչև երեսնապատիկի չափով։
Կշռափաթեթավորված և վաճառքի դրված սննդամթերքի փաթեթի կամ մեջդիր պիտակների վրա օրենքով սահմանված նշումների բացակայությունն առաջացնում է տուգանքի նշանակում՝ սահմանված նվազագույն աշխատավարձի տասնապատիկից մինչև քսանապատիկի չափով։

Ուսումնական հաստատություններում, մանկական և բուժկանխարգելիչ կազմակերպություններում գործող առևտրի և հանրային սննդի օբյեկտներում ալկոհոլային խմիչքների վաճառք իրականացնելն առաջացնում է տուգանքի նշանակում՝ սահմանված նվազագույն աշխատավարձի տասնհինգապատիկից մինչև երեսնապատիկի չափով։

Կենցաղային ծառայության օբյեկտներում մատուցվող ծառայությունների գնացուցակը չփակցնելն առաջացնում է տուգանքի նշանակում՝ սահմանված նվազագույն աշխատավարձի տասնապատիկից մինչև քսանապատիկի չափով։