Փաստ ինֆո

ՀՀ կառավարությանն առընթեր պետական եկամուտների կոմիտեի նախագահի նոյեմբերի 23-ի հրամանով արդեն չորրորդ անգամ և կրկին 30 աշխատանքային օրով կասեցվել են «Սիվիլիթաս» հիմնադրամում իրականացվող բյուջեի հետ փոխհարաբերությունների ճշտության ստուգումները: Այս մասին մասնավորապես ասված է հիմնադրամի տարածած հաղորդագրության մեջ:

Նշվում է նաև, որ Պետական եկամուտների կոմիտեն հիմնադրամում հարկային ստուգումներ սկսել է իրականացնել 2012թ. հունիսի 28-ից: Հուլիսի 20-ից ստուգումների ժամկետն երկարաձգվել էր 10 օրով: Պետեկամուտների կոմիտեի նախագահի հրամաններով հաջորդաբար՝ հուլիսի 23-ից, սեպտեմբերի 3-ից և հոկտեմբերի 16-ից յուրաքանչյուր դեպքում 30 աշխատանքային օրով և գումարային 90 աշխատանքային օր կասեցվել էին հարկային ստուգումները «Սիվիլիթաս» հիմնադրամում, ինչը և սահմանված է «Հայաստանի Հանրապետությունում ստուգումների կազմակերպման և անցկացման մասին» ՀՀ օրենքով. բյուջեի հետ փոխհարաբերությունների ստուգումները կարող են կասեցվել առավելագույնը 90 աշխատանքային օր ժամկետով, և միայն նշված օրենքով սահմանված որոշակի պայմանների առկայությամբ հիմնավորված դեպքերում ստուգման կասեցման ժամանակահատվածը կարող է երկարաձգվել ևս 10 օրով:

«Անհասկանալի է, թե ինչպես է չորրորդ անգամ 30 աշխատանքային օրով երկարաձգվել ստուգման կասեցման ժամանակահատվածը: Վերը նշված փաստը հաշվի առնելով և վերջինիս հետ իր ունեցած անհամաձայնությունը հայտնելու նպատակով` «Սիվիլիթաս» հիմնադրամը պատրաստվում է գրավոր դիմել ՀՀ ԿԱ ՊԵԿ նախագահին` առկա իրավիճակը հստակեցնելու և համապատասխան քայլեր ձեռնարկելու համար»,-ասված է հիմնադրամի մամլո հաղորդագրության մեջ: