Փաստ ինֆո

ՀՀ կառավարության կողմից երկու շաբաթ առաջ հաստատվել է Վարչական իրավախախտումների վերաբերյալ նոր օրենսգրքի հայեցակարգը, և դրա հիման վրա մինչև 2013-ի տարեվերջ հնարավոր կլինի Ազգային ժողովի դատին ներկայացնել Վարչական իրավախախտումների վերաբերյալ «ամբողջությամբ նոր, մաքրամաքուր օրենսգիրք»: Այս մասին ԱԺ-ի դեկտեմբերի 4-ի նիստում հայտնեց ՀՀ արդարադատության նախարար Հրայր Թովմասյանը:

«Վարչական իրավախախտումների մասին մեր օրենսդրությունը, թերևս, օրենսդրության ամենաանկայուն ոլորտներից մեկն է, ինչն ունի օբյեկտիվ և սուբյեկտիվ մի շարք պատճառներ: Բավական է նշել, որ նորանկախ տարիներին այս օրենսգրքում 200-ից ավելի փոփոխություններ են կատարվել»,-ընդգծեց նախարարը` հավելելով, որ գործող օրենսգրքում կան մի շարք խնդիրներ, և օրենսգրքի համապարփակ փոփոխությունների անհրաժեշտությունը, թերևս, վաղուց է հասունացած: «Մի շարք փորձեր արվել են, բայց, հաշվի առնելով այս օրենսգքրի առանձնահատկությունները` պայմանավորված այն հանգամանքով, որ այն կարգավորում է առաջին հայացքից շատ միասեռ հասարակական հարաբերություններ, բայց, այնուամենայնիվ, կարգավորման ոլորտները բավականին տարբեր են»,-նշեց նա:

«Բավական է նշել, որ այսօր գործող Վարչական իրավախախտումների վերաբերյալ օրենսգրքում մնացել են դեռևս Խորհրդային Միությունից մի շարք դրույթներ, կանոնակարգումներ, որոնք այսօրվա մեր Սահմանադրության հետ որևէ առնչություն չունեն, չասեմ, որ հակասահմանադրական են»,- ասաց Հ. Թովմասյանը:

Այս կապակցությամբ «Ժառանգություն» խմբակցության կազմում «Ազատ դեմոկրատներ» կուսակցության ներկայացուցիչ, ՀՀ նախկին արտգործնախարար Ալեքսանդր Արզումանյանը նկատեց, որ դեռևս 1990-ականներին իրեն ասվել է, որ նոր օրենք է գրվում: «Հիմա 2012 թ.-նն է` այդ օրենքը գրված չէ»,-ասած նա:

Պատգամավորն առաջարկեց նախարարին, ով ԱԺ-ում այսօր առաջին ընթերցմամբ ներկայացնում էր Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին կառավարության օրենսդրական նախաձեռնությունը, ընդհանուր դրույթների վերաբերյալ 1985թ.-ից գործող օրենսգրքի առաջին գլխի բոլոր 8 հոդվածներն ամբողջությամբ ուժը կորցրած համարել:

«Այդ սոցիալիստական սեփականության, ԽՍՀՄ համակարգի պահպանության հետ կապված բոլոր կետերը հանենք: Ամեն Ձեր փոփոխություն բերելիս մենք` որպես Հայաստանի Հանրապետության քաղաքացիներ, ամոթ ենք ապրում և վիրավորանք, որ մենք խոսում ենք մի երկրի մասին, մի կայսրության մասին, որն արդեն 20 տարի գոյություն չունի: Ես չեմ կարծում` Ռուսաստանում նման տերմինաբանություն դեռևս պահպանված լինի օրենքներում»,-հայտարարեց Ա. Արզումանյանը:

«Չհամաձայնվել չեմ կարող»,-արձագանքեց ՀՀ արդարադատության նախարարը` նշելով, որ բացի 8-րդ հոդվածից, որը սահմանում է օրենսդրության գործողությունը, կարելի է քննարկել առաջին գլխի մնացած 7 հոդվածների ուժը կորցրած ճանաչելու առաջարկը: Ըստ նրա, սակայն, դրանով խնդիրը չի լուծվի, «որովհետև տասնյակ այլ հոդվածներում այդ բառերն ամբողջությամբ կան»: Հ. Թովմասյանը հնարավոր համարեց, «ամեն անգամ աչքը չծակելու» նպատակով, այս պահին դիտարկել «մահացած նորմեր» պարունակող 1-7-րդ հոդվածների ուժը կորցրած ճանաչելու հարցը:

ԱԺ փոխնախագահ, հանրապետական Էդուարդ Շարմազանովն իր հերթին նկատեց, որ անձամբ ինքը և, իր կարծիքով, նաև դահլիճում ներկա բոլոր պատգամավորները համամիտ են Ա. Արզումանյանի հետ: «Այնտեղ, որտեղ հղում է արվում ԽՍՀՄ-ի հետ կապված օրենքներին, կառավարությունը ճիշտ կլինի, որ մոտ ապագայում այդ դրույթները հանի»,-հորդորեց ԱԺ փոխնախագահը: