Փաստ ինֆո

Նոյեմբերի 28-29-ին Բրյուսելում կայացած ԵՄ-Հայաստան խորհրդարանական համագործակցության հանձնաժողովի (ԽՀՀ) հերթական` 13-րդ նիստի ավարտին ընդունված Եզրափակիչ հայտարարությունը բավականին դրական է: Ի տարբերություն ԽՀՀ-ի նախորդ համանման հայտարարությունների, խստացվել և ավելի հստակեցվել են ղարաբաղյան հակամարտության և հայ-թուրքական հարաբերությունների կարգավորման հետ կապված ձևակերպումները, որոնցում, ի դեպ, առաջին անգամ Հայոց ցեղասպանության մասին հիշատակում կա: Բացի այդ, ամրագրումներ կան կապված Ստեփանակերտի օդանավակայանի, Ռամիլ Սաֆարովի գործի առնչությամբ:

Այս մասին դեկտեմբերի 3-ի նիստում նշեցին հանձնաժողովի համանախագահ, Ազգային ժողովի ՀՀԿ խմբակցության անդամ Սամվել Ֆարմանյանի գլխավորած բազմակուսակցական պատվիրակության անդամները` ամփոփելով բրյուսելյան նիստի արդյունքները: Բանախոսների գնահատմամբ, այս նպաստավոր ամրագրումները, որոնց ընդունմանն, ի դեպ, որոշ դեպքերում հաջողվել է հասնել ադրբեջանական լոբբիստական ջանքերի հաղթահարմամբ, հանձնաժողովի հայ անդամների համակարգված աշխատանքի, միակամության արդյունք են` անկախ ԱԺ պատգամավորների քաղաքական հայացքներից և ներքին կյանքի վերաբերյալ ունեցած հակադիր դիքորոշումներից:

Խորհրդարանական համագործակցության հանձնաժողովն իր եզրափակիչ հայտարարության և առաջարկությունների մեջ տարածաշրջանային կայունության հարցերի վերաբերյալ, մասնավորապես, «դատապարտում է Ադրբեջանի նախագահի որոշումը, որով ներում է շնորհվել ԵՄ անդամ երկրի դատարանների կողմից դատապարտված մարդասպան Ռամիլ Սաֆարովին, խորը մտահոգություն է հայտնում Սաֆարովին Ադրբեջանին արտահանձնելուց հետո վերջինիս հերոսացման կապակցությամբ, համարում է, որ այդ քայլը ոչ միայն հակասում է միջազգային իրավունքին, այլև նպաստում է տարածաշրջանում լարվածության հետագա աճին, սրելով անարդարության զգացումը, դատապարտում է նման ցանկացած սադրանք, որն էլ ավելի կմեծացնի լարվածությունն առանց այդ էլ լարված ու փխրուն իրավիճակում»:

Նշվում է նաև, որ հանձնաժողովը «խորապես մտահոգված է, որ նման գործողությունները կարող են սպառնալիքի տակ դնել հաշտության փորձերը և էլ ավելի խափանել տարածաշրջանում մարդկային խաղաղ շփումների հետագա զարգացումը, ինչը կարևոր միջոց է կայուն խաղաղության հասնելու համար»:

Հանձնաժողովը «ողջունում է բոլոր այն հայտարարությունները, որոնք նպաստում են հակամարտության խաղաղ կարգավորմանը և հիշեցնում է, որ Լեռնային Ղարաբաղի օդանավակայանի ծրագրված բացման հետ կապված ԵԱՀԿ Մինսկի խմբի համանախագահները բոլոր կողմերից ստացել են նոր հավաստիացումներ առ այն, որ համաձայն միջազգային իրավունքի` նրանք մերժում են քաղաքացիական օդանավերի դեմ ուժի կամ դրա սպառնալիքի կիրառման ցանկացած փորձ և որ ձեռնպահ կմնան այդ հարցի քաղաքականացումից»:

Նշենք, որ ընդունված փաստաթղթի ամբողջական տեքստին կարող եք ծանոթանալ «Pastinfo.am» կայքում հետևյալ հասցեով` www.pastinfo.am/hy/node/4371: