Փաստ ինֆո

Ազգային ժողովի Էթիկայի հարցերով ժամանակավոր հանձնաժողովը դեկտեմբերի 7-ի նիստում կքքնարկի ՀՅԴ խմբակցության ղեկավար Արմեն Ռուստամյանի և քաղաքացի Մ.Պատվականյանի դիմումների քննության վերաբերյալ հարցերը: Այս մասին տեղեկանում ենք վերոհիշյալ հանձնաժողովի կայքէջում տեղադրված դեկտեմբերի 7-ի նիստի օրակարգից:

Քննության արդյունքում հանձնաժողովը պետք է կայացնի դիմումը կամ վարույթ ընդունելու, կամ մերժելու որոշում:

Ինչպես «Pastinfo.am»-ն ավելի վաղ տեղեկացրել էր, Ազգային ժողովի ՀՅԴ խմբակցությունը նոյեմբերի 28-ին դիմել է Էթիկայի հարցերով ժամանակավոր հանձնաժողովին` նոյեմբերի 21-ին հրավիրված ԱԺ-ի արտահերթ նիստին չգրանցված պատգամավորների կողմից ԱԺ կանոնակարգ-օրենքի 6.1-րդ հոդվածի 2-րդ մասի ա), գ), զ) կետերով նախատեսված էթիկայի կանոնները խախտելու վերաբերյալ հարցը քննելու և համապատասխան որոշում կայացնելու խնդրանքով: Դիմումին կից ներկայացվել է այդ պատգամավորների ցանկը:

Էթիկայի հարցերով ժամանակավոր հանձնաժողովին ուղղված դիմումում ՀՅԴ խմբակցության ղեկավարն ընդգծել է, որ էթիկայի կանոնների խախտումն արտահայտվել է վերոհիշյալ արտահերթ նիստին չմասնակցելով:

«Չնայած նրան, որ, ԱԺ կանոնակարգ-օրենքի 44-րդ հոդվածի 5-րդ մասի համաձայն, ցանկում ընդգրկված յուրաքանչյուր պատգամավոր կարող էր արտահերթ նիստի գումարման պահից մինչև ժամը 15.00-ն գրանցվել, սակայն չգրանցվելով և սույն դիմումը ներկայացնելու պահին հիմնավորված ձևով չհրապարակելով, այդ թվում` ԱԺ կանոնակարգ-օրենքի պահանջներին համաձայն, իր բացակայության հիմքերը, առանց հարգելի պատճառի չի մասնակցել ԱԺ-ի արտահերթ նիստին: Մինչդեռ, ԱԺ-ի կանոնակարգ-օրենքի 6-րդ հոդվածի 1-ին մասի ա) կետի համաձայն, պատգամավորը պարտավոր է մասնակցել ԱԺ-ի նիստերին: Պատգամավորի նման պահվածքը վկայում է, որ նրա կողմից չի հարգվել օրենքը, պատգամավորը չի ենթարկվել օրենքի պահանջներին, չի պահպանել ԱԺ-ի նիստերի անցկացման կարգը, ինչպես նաև իր պահվածքով չի նպաստել ԱԺ-ի հեղինակությանը և վերջինիս նկատմամբ հարգանքի ձևավորմանը»,-մասնավորապես ասված է դիմումում:

Ըստ դիմումատուի, ավելին` այդ պատգամավորներից յուրաքանչյուրը խոչընդոտել է նաև Սահմանադրությամբ նախատեսված` ԱԺ-ի գործառույթների իրականացմանը և փաստացի նպաստել Սահմանադրության 70-րդ հոդվածով նախատեսված արտահերթ նիստի գումարման, բնականոն գործունեության ձախողմանը: Նաև` «ապօրինի կերպով խուսափել է պատգամավորի 1/3-ի կողմից սահմանված օրակարգով հարցի քննարկումից այն դեպքում, երբ, Սահմանադրության 47-րդ հոդվածի 1-ին մասի համաձայն, յուրաքանչյուր ոք, այդ թվում պատգամավորը պարտավոր է պահպանել Սահմանադրությունը և օրենքները: Նման վարքագիծը և դրա կազմակերպված բնույթ ունենալու հանգամանքը կարող են հիմքեր ստեղծել փաստելու ԱԺ անգործությունը»:

Հիշեցնենք, որ Ազգային ժողովի 48 պատգամավորների նախաձեռնությամբ նոյեմբերի 21-ին հրավիրված խորհրդարանի արտահերթ նիստում նախատեսվում էր քննարկել ՀՀ ընտրական և քրեական օրենսգրքերում, «Բնակչության պետական ռեգիստրի մասին» օրենքում փոփոխություններ և լրացումներ կատարելու մասին «Հայ ազգային կոնգրես» խմբակցության անդամների հեղինակած օրենքների նախագծերի փաթեթը: Սակայն նիստը չկայացավ, քանի որ ԱԺ կանոնակարգ-օրենքով սահմանված երեք ժամում քվորումն այդպես էլ չապահովվեց. գրանցվել էր ընդամենը 46 պատգամավոր, մինչդեռ նիստի աշխատանքը սկսվելու համար անհրաժեշտ էր, որպեսզի գրանցվեր առնվազն 66 պատգամավոր:

Նշենք, որ ԱԺ արտահերթ նիստի տապալման կապակցությամբ «Հայ ազգային կոնգրես» խմբակցությունը Սահմանադրական դատարան դիմելու նպատակով նախաձեռնել էր ստորագրահավաք: Ինչպես դեկտեմբերի 4-ին լրագրողներին հայտնել է ՀԱԿ խմբակցության ղեկավար Լևոն Զուրաբյանը, ստորագրահավաքին արդեն միացել են 34 պատգամավորներ` անհրաժեշտ առնվազն 27-ի փոխարեն: Ձևաթուղթը ստորագրել են «Ժառանագություն» և ՀԱԿ խմբակցություններն ամբողջությամբ, ինչպես նաև պատգամավորներ «Բարգավաճ Հայաստան» խմբակցությունից:

ՀԱԿ-ը մտադիր է Սահմանադրական դատարանից պահանջել ԱԺ կանոնակարգ-օրենքի 44-րդ հոդվածի 4-րդ մասը` արտահերթ նիստ կամ նստաշրջան անցկացնելու մասով, ճանաչել ՀՀ Սահմանադրության 70-րդ և 71-րդ հոդվածներին հակասող և անվավեր: