Փաստ ինֆո

Հիմա էլ հերթն այս հուշարձանին հասավ

‹‹Թռչկան›› քաղաքացիական նախաձեռնությունը ‹‹Պարզ լիճ›› բնության հուշարձան համարվող տարածքում ծառահատումների և շինարարության առնչությամբ այսօր դիմել է ՀՀ բնապահպանության նախարար Արամ Հարությունյանին` պահանջելով ներկայացնել պարզաբանումներ որոշ հարցադրումների կապակցությամբ: Նախաձեռնության ներկայացուցիչները միաժամանակ հիշեցրել են նախարարին, որ այդ տարածքում կատարվող ինչ-ինչ շինարարական աշխատանքների վերաբերյալ քաղաքացի, լուսանկարիչ Վլադիմիր Սարոյանը դեռևս 2012 թ. հոկտեմբերի 24-ին է ահազանգել նախարարության թեժ գծին:

‹‹Սակայն ի պատասխան այդ ահազանգին, ՀՀ բնապահպանության նախարարությունից 16.11.2012թ. հայտնել են, որ այդ տեղամասում անմիջապես կատարվել են ուսումնասիրություններ, որոնց արդյունքները բավարար չեն: Այդ իսկ պատճառով ՀՀ բնապահպանության նախարարի հրամանով ստեղծվել է աշխատանքային խումբ խնդիրն ավելի մանրամասն ուսումնասիրելու նպատակով: Ուսումնասիրությունների արդյունքների մասին լրացուցիչ կտեղեկացնեն››, - արձանագրել են նախաձեռնության հեղինակները նախարարին ուղղված գրավոր դիմումում` ավելացնելով.

‹‹Պետք է նշենք, որ քաղաքացի Սարոյանը վերը նշված խնդրով դիմել է նաև Հանրային Խորհուրդ և մեր նախաձեռնությանը: Նա մեզ տրամադրել է դեռևս 2012 թ. օգոստոսին Դիլիջան ազգային պարկ ՊՈԱԿ-ի ‹‹Պարզ լիճ›› բնության հուշարձան համարվող տարածքում իր կողմից կատարված լուսանկարները, որոնք նրա կողմից երեք ամիս առաջ ներկայացված են եղել ՀՀ բնապահպանության նախարարություն: Այս լուսանկարներում ակնհայտ երևում են բնության հատուկ պահպանվող տարածքի կարգավիճակի հետ անհամատեղելի աշխատանքները, ինչի հետևանքով էական վնաս են հասցվում և արդեն իսկ հասցրել են շրջակա միջավայրին, ինչպես նաև խաթարվել է ‹‹Պարզ լիճ›› բնության հուշարձանի բնական տեսքը:

Մեր կարծիքով խախտված են ‹‹Բնության հատուկ պահպանվող տարածքների մասին›› ՀՀ օրենքով սահմանված ազգային պարկի պահպանման ռեժիմը:

Ելնելով վերոնշյալից և ղեկավարվելով ‹‹Տեղեկատվության ազատության մասին›› ՀՀ օրենքի 6-րդ և 9-րդ հոդվածների պահանջներով` խնդրում ենք մեզ տրամադրել տեղեկատվություն հետևյալ հարցերի վերաբերյալ.

- Ի՞նչ շինարարական աշխատանքներ են կատարվում Դիլիջան ազգային պարկ ՊՈԱԿ-ի ‹‹Պարզ լիճ›› բնության հուշարձան համարվող տարածքում և ի՞նչ նպատակով:

- Ո՞վ կամ ո՞ր կազմակերպությունն է իրականացնում այդ աշխատանքները և ի՞նչ իրավունքով:

- Արդյոք այդ աշխատանքներն իրականացնող անձը կամ կազմակերպությունն ունի՞ շինարարության թույլատրություն և բնապահպանական փորձաքննական դրական եզրակացություն, եթե ունի, ապա հայտնել, թե ե՞րբ և ի՞նչ հիմքով է տրվել նրան:

- Արդյոք բնապահպանական տեսչության կողմից կատարվե՞լ են այդ տարածքում շրջակա միջավայրին արդեն իսկ հասցված վնասի գնահատում:

 Միևնույն ժամանակ խնդրում ենք մեզ տրամադրել բոլոր այդ փաստաթղթերի պատճենները` դրանց առկայության դեպքում: Պատասխանն ակնկալում ենք ստանալ նաեւ մեր Էլեկտրոնային փոստի հասցեով:››

Կատարված աշխատանքների հետևանքով, ըստ ‹‹Թռչկան›› քաղաքացիական նախաձեռնության, հիշյալ բնության հուշարձանի տարածքն այլանդակվել է: Նախաձեռնությունը ի լրումն դիմումի կցել է  ասվածը փաստող մի շարք լուսանկարներ:

Լուսանկարների հեղինակ` Վլադիմիր Սարոյան

Հեղինակ` «Փաստինֆո»