Փաստ ինֆո

Նոյեմբերի 29-ին ՄԱԿ-ի Գլխավոր ասամբլեան 138 «կողմ», 9 «դեմ» և 41 «ձեռնպահ» ձայներով ընդունել է Պաղեստինին ՄԱԿ-ում դիտորդ պետության կարգավիճակ տալու մասին բանաձևը: Հայաստանը կողմ քվեարկած երկրների շարքում է:

ՄԱԿ-ի պաշտոնական կայքէջի համաձայն, բանաձևին կողմ են քվեարկել Ֆրանսիան, Ավստրիան, Նորվեգիան, Պորտուգալիան, Դանիան, Ռուսաստանը, Բելառուսը, Հայաստանը, Ադրբեջանը, Վրաստանը, Տաջիկստանը, Թուրքմենիան, Ղրղըզստան, Ուզբեկստանը և Ղազախստանը:

Դեմ քվեարկածների թվում են Իսրայելը, Կանադան, ԱՄՆ-ն, Չեխիան, Պանաման:

Բանաձևի ընդունմանը ձեռնպահ են եղել, մասնավորապես, Լիտվան, Լատվիան, Էստոնիան, Մոլդովան, Գերմանիան, Մեծ Բրիտանիան, Նիդերլանդները, Լեհաստանը, Սլովակիան, Սլովենիան, Խորվաթիան, Ռումինիան:

Ուկրաինան քվեարկությանը չի մասնակցել:

Բանաձևում, մասնավորապես, ասված է, որ Գլխավոր ասամբլեան «կրկին վերահաստատում է պաղեստինյան ժողովրդի ինքնորոշման և 1967թ.-ից օկուպացված պաղեստինյան տարածքում Պաղեստին պետության անկախության իրավունքը»:

Ընդունված փաստաթղթում նաև հույս է հայտնվում, որ Անվտանգության խորհուրդը դրական լուծում կտա Պաղեստինի` իրեն ՄԱԿ-ի լիիրավ անդամի կարգավիճակ տալու մասին 2011թ.-ի սեպտեմբերի 23-ի դիմումին: Նաև ընդգծվում է մերձավորարևելյան խաղաղության գործընթացի շրջանակներում բանակցությունների վերսկսման և արագացման անհրաժեշտությունը:

Նշենք, որ Պաղեստինը ՄԱԿ-ում մինչ այդ ուներ դիտորդի կարգավիճակ, սակայն Գլխավոր ասամբլեայի նախկին որոշման մեջ ամրագրված չէր, որ այդ կարգավիճակը նրան տրված է որպես պետության:

Նոյեմբերի 29-ին նշվող` Պաղեստինի ժողովրդի հետ համերաշխության միջազգային օրվա կապակցությամբ ՄԱԿ-ի Գլխավոր քարտուղար Պան Գի Մունն ուղերձ է հղել, որում, մասնավորապես, ասված է, որ բանակցային գործընթացի «նպատակը շարունակելու է մնալ արդար և տևական խաղաղության իրագործումը, ինչին ձգտում էին պաղեստինցիներ և իսրայելացիների սերունդները, խաղաղություն, որ վերջ կդնի 1967թ. սկսված բռնագրավման, վերջ կդնի հակամարտությանը և կապահովի, որ անկախ, կենսունակ ու ինքնիշխան Պաղեստին պետությունը գտնվի անվտանգ Իսրայել պետության կողքին»:

«Ես կոչ եմ անում Իսրայելի և Պաղեստինի առաջնորդներին ցույց տալ խորաթափանցություն ու վճռականություն: Ես նաև կոչ եմ անում միջազգային հանրությանը օգնելու նրանց ձևավորել վստահելի քաղաքական ուղի, որը կհամապատասխանի երկու կողմերի օրինական ձգտումներին: Ես խոստանում եմ իմ իշխանության սահմաններում անել ամեն ինչ այս նպատակին աջակցելու համար»,-ասված է ՄԱԿ-ի Գլխավոր քարտուղարի ուղերձում: