Փաստ ինֆո

Երևանի Ավան և Նոր Նորք վարչական շրջանների դատարանում՝ դատավոր Դավիթ Հարությունյանի նախագահությամբ, «Հարսնաքար» ռեստորանային համալիրի տարածքում հունիսի 17-ի բռնարարքի գործով այսօրվա նիստում ցուցմունքներ տվեց երրորդ տուժողը՝ Էդգար Նիկոյանը: Նրա ցուցմունքներն ըստ էության չէին տարբերվում ավելի վաղ հարցաքննված տուժողներ Արտակ Բայադյանի և Գարիկ Սողոմոնյանի ցուցմունքներից:

Տուժող, բռնարարքի հետևանքով հետագայում մահացած Վահե Ավետյանի քենակալ Է. Նիկոյանը միակն է տուժողներից, ով ծեծկռտուքի հետևանքով ուշագնաց չի եղել: Այդուհանդերձ, «ո՞վ, ո՞ւմ է» հարվածել հարցին պատասխանեց՝ «խառնաշփոթ էր»: Տուժողը հաստատեց, որ Վահե Ավետյանը եկավ ու ասաց, որ թույլ չեն տալիս իրեն ռեստորանային համալիրում գտնվել մարզահագուստով, ապա գնաց և վերադարձավ՝ հագին ջինսե տաբատ: Վ. Ավետյանը մատուցողին հարցրեց՝ գուցե կեպիով է՞լ չի կարելի, ինչին մատուցող Դավիթ Ադամյանը հայտարարել է՝ «դուրս արի՝ ասեմ»: Տուժողի վկայությամբ, մատուցողը ջղայնացած էր: Տուժողը Վ. Ավետյանի ետևից դուրս գալով՝ տեսել է Վահեին կքանստած՝ քթից արյուն էր հոսում, «օգնեցինք նրան լվացվել»: Տուժողի տպավորությամբ, համալիրի աշխատողները «հետևում էին մեր ամեն քայլին»: Է. Նիկոյանը հայտնեց, որ համալիրում իրենից հարցնում էին, թե ով է հայհոյել, իրենց ընկերախմբից ոչ ոք, ըստ տուժողի, չի հայհոյել: Առհասարակ, ըստ տուժողի, «իմ վարքագիծը և իմ տեսադաշտում եղած ընկերներիս վարքագիծն եղել է պատշաճ»:

Է. Նիկոյանը հայտնեց, որ համալիրի ավտոկայանատեղիում, որտեղ տուժողները դաժան ծեծի են ենթարկվել, ծեծողները 20 հոգի էին:

Տուժողն՝ ի պատասխան պաշտպանական կողմի հարցերի, նշեց, որ չի տեսել հարվածողների դեմքերը, սակայն միանշանակ հայտարարեց՝ «իմ տեսադաշտում գտնված բոլոր մարդիկ շարժման մեջ էին, այնտեղ կանգնած մարդ չի եղել»: Նա պնդեց, որ բողոք ունի ամբաստանյալների դեմ, որովհետև նրանք ծեծի են ենթարկել իրեն ու իր ընկերներին:

Ամբաստանյալ, մատուցող Դավիթ Ադամյանին ավտոկայանատեղիում չտեսնելու իր ցուցմունքի վերաբերյալ տուժողը պարզաբանեց. «եթե չեմ տեսել, չի նշանակում, որ նա այնտեղ չի եղել»:

Տուժողի հարցաքննությունը կշարունակվի դեկտեմբերի 3-ի դատական նիստում:

Հիշեցնենք, որ ըստ մեղադրանքի, ռեստորանային համալիրի աշխատակիցներ Գարիկ Մարգարյանը, Դավիթ Ադամյանը, Արթուր Բաբլոյանը, Արման Բաղդասարյանը, Արման Խաչատրյանը և Նորայր Հայրապետյանը ծեծի են ենթարկել տուժողներ Վահե Ավետյանին, Արտակ Բայադյանին, Գարիկ Սողոմոնյանին, Արկադի Աղաջանյանին և Էդգար Նիկոյանին` Վահե Ավետյանի առողջությանը դիտավորությամբ պատճառելով կյանքի համար վտանգավոր ծանր վնաս, որն անզգուշությամբ առաջացրել է վերջինիս մահը, Արտակ Բայադյանի և Գարիկ Սողոմոնյանի առողջությանը` միջին ծանրության վնաս` առողջության տևական քայքայումով, իսկ Արկադի Աղաջանյանին և Էդգար Նիկոյանին ծեծի արդյունքում մարմնական վնասվածքներ չեն պատճառվել: