Փաստ ինֆո

Երևանի թ.1 ընտրատարածքում Ազգային ժողովի մեծամասնական ընտրակարգով դեկտեմբերի 2-ին կայանալիք լրացուցիչ ընտրություններում «Ժառանգություն» կուսակցության թեկնածու Ստյոպա Սաֆարյանը դիմել է թիվ 1 ընտրատարածքային ընտրական հանձնաժողովին` ՀՀԿ-ի կողմից առաջադրված թեկնածու Ռոբերտ Սարգսյանի թեկնածության գրանցումը դատական կարգով վիճարկելու և ուժը կորցրած ճանաչելու պահանջով:

«Թեկնածու Ռոբերտ Սարգսյանի և նրա կողմնակիցների կողմից կատարվել են Ընտրական օրենսգրքի և նախընտրական քարոզչության սահմանված կարգի այնպիսի խախտումներ, որոնք ակնհայտորեն կարող են էական ազդեցություն ունենալ ընտրությունների արդյունքների վրա»,-մասնավորապես ասված է դիմումում: Ս. Սաֆարյանը որպես հիմնավորում նշել է իր մրցակցի կողմից թույլ տրված խախտումները` դիմումին կցելով իր մրցակցի պաստառների լուսանկարները, թիվ 1/11 տեղամասային ընտրական հանձնաժողովի շենքում տեղակայված նրա ընտրական շտաբերից մեկի մասին տեսանյութ և ապացուցողական այն նյութեր:

Ս. Սաֆարյանը նշել է, որ ՀՀԿ կողմից առաջադրված թեկնածու Ռոբերտ Սարգսյանը նոյեմբերի 23-ի դրությամբ ԿԸՀ ներկայացրած իր երկրորդ հայտարարագրով մինչև այդ օրը «իր նախընտրական հիմնադրամ կատարված բոլոր մուտքերի հանրագումար ներկայացրել է 2.710.000 դրամը, որից` 2.652.080 դրամը ցույց է տրվել իբրև ԸՕ-ի 26-րդ հոդվածի 2-րդ մասով նկարագրված ապրանքների և ծառայությունների ձեռքբերման համար հիմնադրամից կատարված ծախսերի փաստացի չափ»: «Միաժամանակ այդ նույն գումարը ներկայացրել է թե իբրև այդ ապրանքների ու ծառայությունների ձեռքբերման շուկայական արժեք, թե հիմնադրամի միջոցներից կատարված բոլոր ծախսերի ընդհանուր չափ»,-մասնավորապես նշել է «Ժառանգության» թեկնածուն:

Ըստ դիմումատուի, Ռ. Սահակյանի հիմնադրամի այդ միջոցներից 865.605 դրամը 06.11.2012 թ. փոխանցվել է պաստառի լայնաֆորմատ տպագրության համար, ևս 1.409.500 դրամ` գովազդային վահանակների վրա պաստառների տեղադրման, ինչպես նաև` վահանակների տեղադրման համար: 23.11.2012թ. հավելյալ 156.975 դրամ հիմնադրամից փոխանցվել է պաստառի լայնաֆորմատ տպագրության համար:

«Այս ամենն այն դեպքում, երբ թեկնածուի թվով 12 լայնաֆորմատ պաստառները համապատասխան վահանակներին փակցրել են դեռևս նոյեմբերի 2-ին, մինչդեռ ԿԸՀ սահմանած ժամանակացույցով քարոզարշավը մեկնարկել է նոյեմբերի 4-ից: Թեկնածուն նշել է, որ բացի 220.000 դրամը, մնացած 2.432.080 դրամը ծախսել է հենց այս ծառայության համար»,-դիմումում նշել է Ս. Սաֆարյանը` հավելելով, որ անձամբ ինքն այդ նույն վահանակներից մեկի վրա մայիսի 6-ի խորհրդարանական ընտրություններից առաջ նախընտրական լայնաֆորմատ պաստառ փակցնելու համար վճարել է շուրջ 280.000 դրամ:

«Թեկնածու Ռոբերտ Սարգսյանի կողմից 12 այդպիսի վահանակների պարագայում (կրիչով 12 պաստառների նկարները կցված են) ակնհայտ է, որ դրանց շուկայական գնի հանրագումարը գերազանցում է ոչ միայն ցույց տրված արժեքը, այլև ողջ նախընտրական հիմնադրամի միջոցները: Այսպիսով, ակնհայտ է, որ հիշատակված ապրանքի և ծառայության ձեռքբերման համար թեկնածու Ռոբերտ Սարգսյանի ցույց տրված փաստացի չափը նվազեցված է, չի համապատասխանում դրա իրական շուկայական արժեքին և գերազանցում է հիմնադրամի միջոցներից կատարված բոլոր ծախսերի ընդհանուր չափին»,-ընդգծել է դիմումատուն:

Ս. Սաֆարյանը նշել է նաև, որ ՀՀԿ-ի թեկնածուի քարոզչության հետ կապված ընտրատարածքում «ամեն քայլափոխի տեսանելի են նախընտրական շտաբերի վրա փակցված միջին ֆորմատի վահանակներ (որոնց վրա նշված է 35 տպաքանակ, մինչդեռ դրանք ավելի շատ են), նոյեմբերի 22-ից բոլոր բնակարաններում բաժանվում են թեկնածուի հերթական համարն ընդգծող հիշեցման թերթիկներ, և վերջապես` Ավան ու Նոր Նորք վարչական շրջանների բոլոր շենքերում, վերելակների ներսում կամ դրանցից դուրս գովազդային վահանակների վրա համատարած փակցվել են A3 և ավելի մեծ ձևաչափերի նկարներ»:

«Խոսքը վերաբերում է այդպիսի հազարավոր պաստառների (մի քանի լուսանկարներ կցվում են օրինակի համար): Ակնհայտ է, որ նշված բոլոր ծառայությունների ու ապրանքների փաստացի և շուկայական արժեքները թաքցվում են թեկնածուի կողմից:

Չնայած այս ամենին, ԸՕ-ի մեկ այլ ակնհայտ խախտում վերաբերում է թեկնածուի նախընտրական շտաբերին ու դրանց թվին: Ոչ 1-ին, ոչ էլ 2-րդ հայտարարագրերում թեկնածուն չի հիշատակել որևէ ծախս նախընտրական շտաբերի վարձակալության կապակցությամբ: Ընտրական օրենսգրքի 18-րդ հոդվածի 5-րդ մասը ամրագրում է, որ «ընտրական շտաբերը չեն կարող տեղակայվել պետական և տեղական ինքնակառավարման մարմինների զբաղեցրած շենքերում (բացառությամբ այն դեպքերի, երբ շտաբերը զբաղեցնում են այդ մարմիններին չպատկանող տարածք), ինչպես նաև այն շենքերում, որտեղ գործում են ընտրական հանձնաժողովները»: Մինչդեռ, քարոզարշավի մեկնարկից ի վեր թիվ 1/11 տեղամասային ընտրական..

Մինչդեռ, քարոզարշավի մեկնարկից ի վեր թիվ 1/11 տեղամասային ընտրական հանձնաժողովի շենքում տեղակայվել է Ռոբերտ Սարգսյանի ընտրական շտաբերից մեկը (տեսանյութը կցվում է)»,-պնդում է «Ժառանգության» թեկնածուն` հավելելով, որ իրենց կողմից թիվ 1 ընտրատարածքում հայտնաբերվել է թեկնածուի առնվազն 50 նախընտրական շտաբ` համապատասխան գրառմամբ: Այսինքն` խախտվել է նաև ԸՕ-ի պահանջը, ըստ որի ընտրական շտաբերի թիվը չի կարող գերազանցել ընտրության համար կազմավորված ընտրական տեղամասերի թիվը, տվյալ դեպքում` 35-ը: