Փաստ ինֆո

Երևանի Կենտրոն և Նորք-Մարաշ վարչական շրջանների դատարանում՝ դատավոր Մնացական Մարտիրոսյանի նախագահությամբ, քննվող առևտրային կաշառքի ու ապօրինի վարձատրության վերաբերյալ «Արմենիա» հանրապետական բժշկական կենտրոնի պոլիկլինիկայի թերապևտների դեմ գործով այսօր ցուցմունքներ տվեցին վկա-թերապևտները:

Դատարանում հրապարակվեցին վկաներ Հասմիկ Գասպարյանի, Լաուրա Բդոյանի ու Գայանե Թորոյանի նախաքննական ցուցմունքները՝ դրանց և դատաքննական ցուցմունքների միջև առկա էական հակասությունների պատճառով: Եթե նախաքննական ցուցմունքներում նրանք միանշանակ նշել էին, որ գործով ամբաստանյալ Մարիետա Նահապետյանը «Արմենիա» հանրապետական բժշկական կենտրոնի պոլիկլինիկայի բժշկական փորձաքննության հանձնաժողովի նախագահն է եղել, ապա դատարանում հայտարարեցին, որ Մ.Նահապետյանը հանձնաժողովի նախագահ չի եղել, ընդամենը նրա մոտ էր գտնվում հաշմանդամության կարգ ստանալու ենթակա անձանց գրանցամատյանը: Նախաքննական ցուցմունքներում ամբաստանյալին ներկայացրել են որպես հանձնաժողովի նախագահ «մեխանիկորեն, առանց մտածելու, գեղեցիկ ձևակերպման համար»: Վկաները պնդեցին իրենց նախաքննական ցուցմունքները՝ ի պատասխան դատարանի հարցի՝ նշելով, որ ցուցմունքներ գրելիս քննիչի կողմից իրենց նկատմամբ որևէ պարտադրանք չի եղել:

Վկաները հայտնեցին նաև, որ հարցաքննվել են աշխատավայրում, ընդ որում՝ թերապևտները հարցաքննվել են միաժամանակ, քննիչը թղթեր է բաժանել, իրենք էլ՝ «ընդհանուր նստեցինք, գրեցինք»:

Դեկտեմբերի 5-ի դատական նիստում կհարցաքննվի վերջին վկա Յայլոյանը, ով չէր ներկայացել այսօրվա նիստին վատառողջ լինելու պատճառաբանությամբ, հաջորդ նիստին էլ չներկայանալու դեպքում կհրապարակվեն նրա նախաքննական ցուցմունքները, և դատարանը կանցնի ամբաստանյալների հարցաքննությանը:

Ըստ մեղադրական եզրակացության, «Արմենիա» հանրապետական բժշկական կենտրոնի պոլիկլինիկայի թերապևտ Լաուրա Համբարձումյանը, հաշմանդամության կարգ ստանալու նպատակով բժշկական հաստատություն դիմած Լևոն Ավետիսյանի կնոջը՝ Կարինե Հովհաննիսյանին, 2012թ. մարտի 21-ին հայտնել է, որ Լ. Ավետիսյանին բժշկասոցիալական փորձաքննության հանձնաժողով ուղեգրելու հարցը լուծելու համար անհրաժեշտ է պոլիկլինիկայի բժշկական փորձաքննության հանձնաժողովի նախագահ Մարիետա Նահապետյանին տալ 20.000 ՀՀ դրամ: Համոզելու եղանակով Կ. Հովհաննիսյանի մոտ առաջացրել է հանցագործություն կատարելու դիտավորություն և վճռականություն, վերջինիս դրդել է ամուսնու օգտին գործողություններ կատարելու համար առևտրային կազմակերպության ծառայող Մ. Նահապետյանին տալ առևտրային կաշառք։

«Արմենիա» հանրապետական բժշկական կենտրոնի պոլիկլինիկայի բժշկական փորձաքննության հանձնաժողովի նախագահ Մարիետա Նահապետյանին մեղադրանք է առաջադրվել առ այն, որ հաշմանդամության կարգ ստանալու նպատակով նշված բժշկական հաստատությունում հետազոտության ենթարկված Լևոն Ավետիսյանին բժշկասոցիալական փորձաքննության հանձնաժողով ուղեգրելու համար, 2012թ. մարտի 21-ին, ժամը 13:00-ի սահմաններում «Արմենիա» հանրապետական բժշկական կենտրոնի պոլիկլինիկայի 4-րդ հարկում գտնվող իր աշխատասենյակում, վերջինիս կնոջից՝ Կարինե Հովհաննիսյանից ապօրինաբար ստացել է 20.000 ՀՀ դրամ։

Երևանի թիվ 1 Բժշկասոցիալական փորձաքննության հանձնաժողովում որպես բուժքույր-վիճակագիր Մաքրուհի Ռոստոմյանը մեղադրվում է այն բանի համար, որ հաշմանդամության կարգ ստանալու նպատակով նշված բժշկասոցիալական հանձնաժողով դիմած Լևոն Ավետիսյանի կնոջը՝ Կարինե Հովհաննիսյանին 2012թ. մարտի 28-ին հայտնել է, որ Լևոն Ավետիսյանին հաշմանդամության 2-րդ կարգ սահմանելու հարցը լուծելու համար անհրաժեշտ է Երևանի թիվ 1 բժշկասոցիալական փորձաքննության հանձնաժողովի նախագահ Դանիել Մանուկյանին տալ 20.000 ՀՀ դրամ։ Համոզելու եղանակով Կ. Հովհաննիսյանի մոտ առաջացրել է հանցագործություն կատարելու դիտավորության և վճռականության, վերջինիս դրդել է ամուսնու օգտին գործողություններ կատարելու համար պաշտոնատար անձ հանդիսացող Դ. Մանուկյանին տալ կաշառք։