Փաստ ինֆո

Հայաստանում ինքնասպանության դիմելու ամենատարածված միջոցը Կիևյան կամրջից նետվելն է: Միջոցներից են նաև գերդոզավորումը:

Այսօր հրավիրած ասուլիսում նշեց սոցիոլոգ Ահարոն Ադիբեկյանը: Ըստ նրա` աշխարհում ինքնասպանության ամենատարածված ձևը կախաղանին դիմելն է: Իսկ ԱՄՆ-ում զենքն է, քանի որ այնտեղ զենքի ազատ վաճառք կա:

Մեզանում, ըստ Ա. Ադիբեկյանի, զենքով ինքնասպանություն գործում են պետական պաշտոնյաները, որոնք զենք ունենալու իրավունք ունեն և հանցագործները: Սոցիոլոգի խոսքով՝ քրիստոնեության մեջ ինքնասպանությունը դատապարտվում է. «Ինքնասպանին իրավունք չեն ունեցել հուղարկավորել գերեզմանում: Սա նշանակում է, որ ինքնասպանի հոգին երբեք չի համբարձվի երկինք, նրան ոչ ոք չի ների»,- նշեց Ա. Ադիբեկյանը: Նրա խոսքով՝ Հայաստանը աշխարհում ինքնասպանությունների ամենացածր մակարդակ ունեցող երկրների ցուցակում է:

Oրինակ, Լիտվիայում 15 անգամ ավելի շատ է ինքնասպանություն լինում, քան մեր երկրում: «2011-ին Հայաստանում պաշտոնական տվյալներով ինքնասպանության 195 դեպք է գրանցվել»: Սոցիոլոգի խոսքով՝ ինքնասպանների 80 տոկոսը ազդանշան է ուղարկում իր շրջապատին, որ պատրաստվում է դիմել այդ քայլին: Ինքնասպանների մեծ մասը կամ ինքնամեկուսացած են, կամ ունեն մեծ շրջապատ:

Միջազգային վիճակագրությունը ցույց է տալիս, որ եթե մեկը ձեռք է մեկնում ինքնսպանին կամ շփման մեջ է մտնում նրա հետ` 10-ից 8-ի դեպքում ինքնասպանություն գործելու ցանկություն ունեցողը հետ է կանգնում այդ քայլից: Երբ փողոցում մեկը մոտենում է, ձեզանից 50 դրամ է խնդրում, եթե դա նրան չտաք, այդ մարդը կարող է ծայրահեղ քայլերի դիմել: Ուստի միակ դեղամիջոցը ինքնասպանությունների դեպքում նուրբ վերաբերմունքն է մեզանից օգնություն խնդրողի նկատմամբ»,- խոսքը եզրափակեց Ա. Ադիբեկյանը: