Փաստ ինֆո

Վերջերս ավարտվեց Գյումրու նախկին քաղաքապետ Վարդան Ղուկասյանի դստեր փեսացուի սպանության գործով նախաքննությունը։ Գործն ուղարկվել է դատարան։ «Ժողովուրդ»–ը, լինելով Գյումրիում, փորձել է հետաքննություն կատարել՝ հասկանալու համար, թե իրականում ինչ է տեղի ունեցել, և ինչու է այդ սպանությունն ուղղորդված մի շարք մութ հարցերով, որոնց պատասխանները չտվեց անգամ մի քանի ամիս տևած նախաքննությունը։

Կարեն Եսայանը սպանվել էր ապրիլի 12-ին, այս գործով մեղադրվում է Անիի տարածաշրջանի նախկին ոստիկանապետի որդին՝ Հարություն Սարգսյանը։

«Ժողովուրդ»–ը հանդիպել է սպանվածի հարևաններից մեկին, ով պատմել է, որ Կարենը նշանադրեքի նախօրեին իր մեքենան թողել է ավտոլվացման կետում։ Դրա հաջորդ օրը գնացել է, որպեսզի վերցնի այնտեղից։ Նշանդրեքի առավոտյան՝ ժ. 10:30-ի սահմաններում, Կարենի մայրը զանգել է որդուն, սակայն նրա զանգերն անպատասխան են մնացել։ Տեսնելով որ չի պատասխանում, անմիջապես գնացել է Ղուկասյանների տուն հետաքրքրվելու, թե որտեղ է որդին։ Իսկ Ղուկասյանն էլ խորհուրդ է տվել դիմել ոստիկանություն։

Հարցումների ընթացքում ձերբակալվածին ճանաչողներից մեկը թերթին տեղեկացրել է, որ սպանվածի դիակը գտել է Վարդան Ղուկասյանը երեկոյան ժամը 20:30-ի սահմաններում «Սև Ղուլ» կոչվող թաղամասում։ Նաև թերթը պարզել է, որ «Սև Ղուլ» գնում են միայն սիրահարված զույգերը և «ռազբորկաներ»–ի մասնակիցները։ Գյումրեցիները նշել են, որ այդ վայրը գտնվում է Ղուկասյանների տան մոտ։ «Հինգ ոստիկանապետեր իրենց կազմով գնացին, ու ոչ ոքի չհաջողվեց հայտնաբերել դիակը, բայց արի ու տես՝ Ղուկասյանը գտավ։ Գտավ ու երևի բոլոր հետքերն էլ ոչնչացրեց։ Ինչքան գիտեմ, տեղազննությունից ոչինչ չկա, նույնիսկ դեպքի վայր չկա։ Առ այսօր պարզ չէ, թե ում մատնահետքերն են մեքենայի վրա»,–տեղեկաց֊րել է թերթի գյումրեցի զրուցակիցը՝ հավելելով որ սպանվածի մեքենան սպանության օրը անցել է Ղուկասյանի թաղամասով։ Նրա խոսքով՝ փորձաքննությունից պարզվել է, որ դիակի վրա հայտնաբերվել են աղջկա շեկ մազեր, որից հետո գյումրեցի ոստիկանները սկսել են շեկ աղջիկների փնտրել։ «Մի շրջան խոսակցություններ պտտվեցին, թե մարդասպանը աղջիկ է։ Դե «Սև Ղուլ» էլ գնում են միայն աղջիկների հետ։ Միգուցե Կարենին խաբել են ու տարել, հը՞... Չգիտեմ, շատ մութ ու անհասկանալի բաներ են կատարվում»,–ներկայացրել է թերթի զրուցակիցը։ Նրա պատմելով՝ Գյումրու տաքսու վարորդներին ահաբեկելով նաև կաշառք խոստանալով՝ ստիպում են ցուցմունք տալ, որ իբր նրանք տեսել են, թե ինչպես է Հարությունը նստում Կարենի մեքենան։

Գյումրու թերթի զրուցակիցներից պատմել են, որ ավտոլվացման կետի տեսախցիկները Ղուկասյանը սպանության օրը հանել է և ինքն անձամբ է ուսումնասիրել։ Այնուհետև հետաքրքրվել է ու պարզել, որ Հարությունն էլ է այդ օրն օգտվել ավտոլվացման կետից։ Դա լսելով՝ Ղուկասյանը բարձրաձայնել է. «Քաղաքական է ու իմ դեմ է»։ Բանն այն է, որ Հարությունը ժամանակին մտերիմ է եղել ԲՀԿ-ական Մարտուն Գրիգորյանի հետ։

Թե ով կամ ինչ ազդեցություն է ունեցել քննիչների վրա, որ այս գործն ունեցել է այսպիսի ավարտ, դժվար է ասել, գրում է թերթը, բայց փաստ է, որ նախաքննության ընթացքը չի բավարարում ո՛չ տուժող ո՛չ էլ մեղադրվող կողմերին: