Փաստ ինֆո

Այսօր ուժի մեջ մտավ ՀՀ կառավարության նոյեմբերի 1-ի որոշումը, որով փոփոխություններ են կատարվել «Հղիության արհեստական ընդհատման կարգը և պայմանները հաստատելու մասին» կառավարության 2004 թ.-ի օգոստոսի 5-ի որոշման մեջ:

Ըստ այդմ, սահմանվում է հղիության արհեստական ընդհատումը` որպես բժշկական միջամտություն, և ամրագրվում են դրա վիրաբուժական և դեղորայքային տարատեսակները` «Մարդու վերարտադրողական առողջության և վերարտադրողական իրավունքների մասին» օրենքի պահանջներին համապատասխան: Միաժամանակ հստակեցվում են հղիության արհեստական ընդհատումների բժշկական գործելակարգերը` Առողջապահության համաշխարհային կազմակերպության կողմից առաջարկվող չափանիշներին համահունչ:

«Հղիության արհեստական ընդհատման կարգը և պայմանները հաստատելու մասին» որոշման մեջ, մասնավորապես, ամրագրվել է, որ կնոջ դիմումի համաձայն և ՀՀ կառավարության 2004 թ. օգոստոսի 5-ի որոշման հավելվածով սահմանված բժշկական հակացուցումների բացակայության դեպքում հղիության արհեստական ընդհատումը՝ մինչև 9 շաբաթական հղիությունը, կատարվում է վիրահատական կամ դեղորայքային ընդհատման միջոցով, իսկ 9-12 շաբաթական հղիության դեպքում՝ միայն վիրահատական ընդհատման միջոցով:

Վերանայված որոշմամբ ամրագրվում է նաև, որ մինչև 22 շաբաթական ժամկետը բժշկական և սոցիալական ցուցումներով հղիության արհեստական ընդհատումը կատարվում է բժշկական հաստատությունում մշտապես գործող մասնագիտական հանձնաժողովի որոշման հիման վրա` կնոջ համաձայնությամբ, կառավարության այս որոշման հավելվածներով սահմանված ցուցումներին համապատասխան:

Հղիության արհեստական ընդհատման վիրահատություն, այդ թվում` հղիության վաղ ժամկետներում, կատարվում է միաժամանակ մանկաբարձական և գինեկոլոգիական հիվանդանոցային բժշկական օգնության և սպասարկման լիցենզիաների առկայության դեպքում։ Հղիության դեղորայքային արհեստական ընդհատումը կատարվում է մանկաբարձական կամ գինեկոլոգիական հիվանդանոցային բժշկական օգնության և սպասարկման լիցենզիա ունեցող բժշկական հաստատություններում` ցերեկային ստացիոնարի պայմաններում: