Փաստ ինֆո

Ադրբեջանի նախագահի աշխատակազմի ներկայացուցիչ Ալի Հասանովը, ելույթ ունենալով այդ երկրում քիչ հայտնի «Կապի աշխարհ» /Ռաբիտա դյունյասի/ թերթի 20-ամյակի առթիվ, ասել է, որ իրենց օբյեկտիվությամբ և հավաստիությամբ ադրբեջանական ԶԼՄ-ներն աշխարհի առաջատարներն են:

Իր երկրին պարբերաբար, առիթով կամ անառիթ, չունեցած արժանիքներ վերագրող պաշտոնյային ադրբեջանական «contact.az» կայքը պատասխանում է, որ «...փորձենք այս նորությունն ընդունել լրջորեն»:

Եվ ներկայացնում է բարձրաստիճան պաշտոնյայի խոսքերին իր անդրադարձը: Լրատվամիջոցը գրում է, որ եթե Ա. Հասանովի խոսքը վերաբերում է նորությունների փոխանցմանը, ապա, իրոք, առանձնակի վիճաբանության հիմք չկա: Իրադարձությունների անմիջական վայրերից հաղորդումներն արվում են ժամանակակից տեխնիկական բոլոր միջոցներով՝ բջջային «հեռախոսներով, համակարգիչներով և այլ տեխնոլոգիական հրաշքներով»: Կամ, ահա, արտաքին գործերի նախարարն ինչ-որ բան ասաց և անմիջապես «...նրա հայտարարությունը կախված է համացանցում՝ ադրբեջաներեն, ռուսերեն և անգլերեն»:

Կայքը նշում է, որ, ճիշտ է, նորությունները հազվադեպ են ստուգվում, բայց չգիտես ինչու շատ հաճախ դրանք հեղինակներից ստացվում են «նա ասաց» ձևաչափով, որն, անշուշտ կարծես էականորեն տարբերվում է «Ես ասացի»-ից:

Ինչ վերաբերում է օբյեկտիվությանը, ապա բավական է թերթել մի քանի «օնլայն» հրատարակություններ, և անմիջապես աչքի են զարնում էժանագին կատակներն ու վերլուծությունը, որոնցում բաց տեքստով գրված է, որ «հայերն այնպիսին և այսպիսին են, մենք շատ ավելի լավն ենք նրանցից»,- ընդգծում է լրատվամիջոցը:

Եվ, ի վերջո, հոդվածը հաստատում է պաշտոնյայի սնապարծ և անհիմն խոսքերից ածանցվող սպասումը. «Եթե մենք, իրոք, ցանկանում ենք երբևէ լուծել ավելի քան 20 տարի ձգվող կոնֆլիկտը, անվանարկելով ընդդիմախոսին, ապա դա ճիշտ դիրքորոշում չէ»:

Բարոյական բոլոր տեսակի չափանիշները ոտնահարելով, իրական ու կեղծ արժեքների մեջ տարբերակում չդնելով սեփական ցանկություններն առաջ մղելու, իսկ հակառակ կողմին բոլոր եղանակներով ու միջոցներով, եթե ոչ ոչնչացնելու, ապա վարկաբեկելու՝ Բաքվի իշխանությունների մարտավարությունը չի ընկրկում որևէ պայմանականության առջև:

Օրինակ, այս նույն կայքի վկայությամբ «օբյեկտիվ» ադրբեջանական ԶԼՄ-ները չեն ամաչել ամենադիտվող ժամին ցուցադրել ադրբեջանցի ընդդիմադիրի մասին սեռական բնույթի տեսագրություն: Իսկ 2008թ. Ալի Հասանովի գաղափարակիցների բարձր հովանու ներքո այդ նույն «օբյեկտիվ»-ները չամաչեցին հայհոյախոսությունների տարափ տեղալ ընդդիմադիր լրագրողի հասցեին՝ նրան անվանելով համասեռամոլ և վերագրելով այնպիսի հատկանիշներ, որոնք առնչվում էին մարդու իրավունքների ոլորտին:

Նույնիսկ մի այնպիսի միջավայր, ինչպիսին համացանցն է, ադրբեջանական իշխանությունների համար ունի ազատության սեփական ընկալումներով մենաշնորհված կիրառում: Եվ եթե Հասանովը հաստատում է, որ, օրինակ, իրենց երկրում համացանցն ազատ է և ոչ մեկն իր բլոգում կամ համացանցի այլ միջավայրում գրածի համար չի տառապում, ապա, անշուշտ նկատի ունի հենց նման մոտեցումները:

Սակայն ամեն ինչ իրականում բոլորովին այլ է: Օրինակ, տակավին վերջերս, սեպտեմբերի 29-ին բլոգեր Զաուր Գուրբանլին իր էջում հրապարակեց դասագրքային մի լուսանկար Լեյլա Ալիևայի բանաստեղծությամբ և, «Turan» լրատվական գործակալության վկայությամբ, ընդդիմադիր բլոգերին կազմակերպված հանցավորության դեմ պայքարի վարչությունն առանց այլևայլության ձերբակալեց:

Կամ Հասանովն ասում է, որ «ԶԼՄ-ները ծաղկում են, ինչպես երբեք»: Դա ասվում է այն ժամանակ, երբ երկրի առաջատար թերթերից մեկը՝ «Ազադլիգ»-ն այսօր հասցվել է սնանկության եզրին, ամեն կերպ հալածվում է իշխանությունների կողմից և որի մասին անդրադարձել ենք նաև 12.11.2012թ.-ին հրապարակված հոդվածում:

Սամվել Մարտիրոսյան