Փաստ ինֆո

Այսօր շարունակվեց «Պահանջում ենք պատժել «Հարսնաքարում» տեղի ունեցածի բոլոր մեղավորներին» հասարակական շարժման նախաձեռնող խմբի ակտիվիստ Դավիթ Սանասարյանի հայցն ընդդեմ նախկին պատգամավոր Ռուբեն Հայրապետյանի դատական նիստը: Նախորդ նիստը հետաձգվել էր, քանի որ Ռուբեն Հայրապետյանի ներկայացուցիչը դատարանին խնդրել էր վերանայել Դավիթ Սանասարյանի ներկայացուցիչ Մհեր Արշակյանի լիազորությունների ճանաչման հարցը:

Այսօրվա նիստում դատավոր Էդուարդ Ամալյանը բավարարեց պատասխանող կողմի միջնորդությունը և Դավիթ Սանասարյանի ներկայացուցիչ Մհեր Արշակյանի լիազորություններն անվավեր ճանաչեց:

Դավիթ Սանասարյանն իր ստորագրությամբ ամրագրեց Մհեր Արշակյանի ներկայացրած հայցադիմումը, իսկ որպես Դավիթ Սանասարյանի ներկայացուցիչ այսուհետ հանդես կգա փաստաբանական պալատի փաստաբան Կարապետ Բադալյանը: Վերջինս գործի մանրամասներին ծանոթանալու նպատակով միջնորդեց դատարանին նիստը հետաձգել:

Դատավոր Է. Ամալյանը բավարարեց միջնորդությունը և հաջորդ նիստը նշանակվեց դեկտեմբերի 13-ին:

Հիշեցնենք, որ ըստ պատասխանող կողմի՝ նա երեք տարբեր գործերով դատական ներկայացուցչություն է իրականացնում, որը «Փաստաբանության մասին» ՀՀ օրենքի 5-րդ հոդվածի համաձայն՝ դիտվում է որպես պարբերաբար կամ վճարովի հիմունքներով մատուցված ծառայություն, որը կարող է իրականացնել միայն փաստաբանը: Սակայն ըստ պատասխանող կողմի՝ Արշակյանը, հանդիսանալով նաև Ռուբեն Հայրապետյանի հարցազրույցում հիշատակված երկու այլ անձանց՝ Հրանուշ Խառատյանի և Գարեգին Չուգասզյանի, լիազոր ներկայացուցիչը, փաստաբան չէ:

Ի պատասխան Մհեր Արշակյանը դատարանին հայտնել էր, որ խոսքը վերաբերում է նույն հոդվածով երեք հայցի, որոնք ուղղված են նույն պատասխանողի դեմ, ուստի այն չի կարող դիտվել որպես պարբերաբար կրկնվող:

Հիշեցնենք, որ Դավիթ Սանասարյանը դիմել էր Ավան և Նոր Նորք վարչական շրջանների ընդհանուր իրավասության դատարան ընդդեմ նախկին պատգամավոր Ռուբեն Հայրապետյանի, քանի որ վերջինս օգոստոսի 11-ին Nouvelles d’Armenie ամսագրին տված հարցազրույցում «անվայելուչ վիրավորանքներ, զրպարտող, իրականությանը չհամապատասխանող հայտարարություններ և սպառնալիքներ էր հնչեցրել Դավիթ Սանասարյանի հասցեին, որն արատավորել էր իր պատիվն ու արժանապատվությունը»:

Ըստ դիմողի՝ հարցազրույցում Ռ. Հայրապետյանի «այ ճիճու», «մինչև մահ վախենալու են ինձանից», «իրենց ընտանիքներն իմ ձեռքը կրակն են ընկնելու» և այլ արտահայտությունները արատավորել են իր բարի համբավն ու արժանապատվությունը: