Փաստ ինֆո

Ազգային ժողովի 48 պատգամավորների նախաձեռնությամբ այսօր կեսօրին հրավիրվել է խորհրդարանի արտահերթ նիստ: Օրակարգում ընդգրկված է «Հայ ազգային կոնգրես» խմբակցության անդամների հեղինակած` ՀՀ ընտրական և քրեական օրենսգրքերում, «Բնակչության պետական ռեգիստրի մասին» օրենքում փոփոխություններ և լրացումներ կատարելու մասին օրենքների նախագծերի փաթեթը:

Քիչ հավանական է, որ արտահերթ նիստը կայանա, քանի որ քաղաքական մեծամասնության ներկայացուցիչները վերջին օրերին բազմիցս հայտարարել են, թե կոալիցիոն ուժերը չեն մասնակցելու հրավիրվելիք նիստին` ընդդիմության նախաձեռնությունը ժամանակավրեպ լինելու հիմնավորմամբ:

Արտահերթ նիստ հրավիրելու նախաձեռնության տակ ստորագրած «Հայ ազգային կոնգրես», «Բարգավաճ Հայաստան», ՀՅԴ և «Ժառանգություն» խորհրդարանական խմբակցություններն ունեն 53 պատգամավոր, ևս 2 պատգամավորներ անկախ են, մնացած 74-ը ներկայացնում են քաղաքական կոալիցիան` ՀՀԿ-ն և «Օրինաց երկիր»-ը:

ԱԺ կանոնակարգ-օրենքի համաձայն, ԱԺ նիստն իրավազոր է, եթե քվորումն ապահովված է, այսինքն` գրանցվել է պատգամավորների ընդհանուր թվի կեսից ավելին` առնվազն 66 պատգամավոր: Նիստը սկսվելու համար անհրաժեշտ թվով պատգամավորներ չգրանցվելու դեպքում գրանցումը կշարունակվի մինչև քվորում ապահովելը, բայց ոչ ավելի, քան 3 ժամ: Այդ ժամկետում քվորումի չապահովման դեպքում տվյալ օրվա նիստերը կհամարվեն չկայացած:

Նշենք, որ խորհրդարանական ընդդիմության հեղինակած օրենքների նախագծերի փաթեթին կառավարությունը տվել է բացասական եզրակացություն, նշելով, որ այն չի համապատասխանում Սահմանադրությանը: Դա, մասնավորապես, վերաբերում է ՀՀ ընտրական օրենսգրքում առաջարկվող փոփոխությանը, ըստ որի նախատեսվում է պարտադիր ժամկետային զինծառայության մեջ գտնվող կամ վարժական հավաքներ անցնող զինծառայողներին, ձերբակալված կամ կալանավորված անձանց զրկել համապետական ընտրություններին մասնակցելու իրավունքից:

Սահմանադրությանը հակասող է համարվել նաև «Բնակչության պետական ռեգիստրի մասին» օրենքում առաջարկվող այն փոփոխությունը, որով նախատեսվում է ՀՀ-ից վեց ամսվանից ավելի ժամկետով անընդմեջ բացակայող քաղաքացիներին, լիազոր մարմնի նախաձեռնությամբ, անմիջապես հանել Հայաստանում բնակության վայրի հաշվառումից` ռեգիստրում պահպանելով նրանց անհատական հաշվառման տվյալները:

Ինչ վերաբերում է Ազգային ժողովի ընտրությունները 100 տոկոս համամասնական ընտրակարգով անցկացնելու առաջարկին, ապա, ըստ կառավարության, «գործնականում առկա են մի շարք հիմնախնդիրներ, որոնք անհրաժեշտ է հաշվի առնել նախքան օրենսդրական համապատասխան փոփոխություններ նախատեսելը»:

Կառավարությունը դեմ է նաև ընտրողների ստորագրած ցուցակները լուսապատճենելու և տեղամասային կենտրոններում փակցնելու, ինչպես նաև Կենտրոնական ընտրական հանձնաժողովի համացանցային կայքում տեղադրելու առաջարկին:

Նշենք, որ, ըստ լրատվամիջոցների հրապարակումների, ԱԺ-ի «Հայ ազգային կոնգրես» խմբակցության ղեկավար և ՀԱԿ համակարգող Լևոն Զուրաբյանը նոյեմբերի 20-ի ասուլիսում հայտարարել է, որ, մասնավորապես, հակասահմանադրական համարվող` ընտրություններին զինծառայողների չմասնակցելու հարցում իրենք պատրաստ են գնալ կոմպրոմիսի. «Մենք պատրաստ ենք բավարարել նրանց պահանջը, եթե միայն սա է խոչընդոտ հանդիսանում Ընտրական օրենսգրքում փոփոխություններ կատարելուն»:

Լ. Զուրաբյանը նաև կոչ է արել բոլոր նրանց, ովքեր հետաքրքրված են ընտրական համակարգի փոփոխման ճակատագրով, նոյեմբերի 21-ի ժամը 14-ին հավաքվել ԱԺ-ի մոտ: